सर्वोच्चद्वारा जनप्रतिनिधिको राजीनामा बारेको रिट खारेज

काठमाडौं — सर्वोच्च अदालतले सिन्धुपाल्चोकको हेलम्बु गाउँपालिका अध्यक्ष निमा ग्याल्जेन शेर्पाले दायर गरेको रिट खारेज गरिदिएको छ ।

निर्वाचन आचारसंहिताले बहालवाला जनप्रतिनिधिले पुनः उमेदवारी दिन राजीनामा दिनुपर्ने प्रवधानविरुद्ध शेर्पाले रिट दायर गरेका थिए । चैत २ गते शेर्पाले दायर गरेको रिटमा सर्वोच्चले ८ चैतमा अल्पकालीन अन्तरिम आदेश जारी गरी आचारसंहिता कार्यान्वयनमा रोक लगाएका थियो ।

तर, मंगलबार न्यायाधीशहरू तेजबहादुर केसी र तिलप्रसाद श्रेष्ठको संयुक्त इजलासले शेर्पाको रिट खारेज गर्दै निर्वाचन आचारसंहिता कार्यान्वयनको बाटो खोलिदिएको छ ।

अब उम्मेदवारी दिन चाहने स्थानीय तहका जनप्रतिनिधिको कार्यकाल वैशाख ११ गते नै समाप्त हुने छ । उमेदवार बन्न नचाहने जनप्रतिनिधहरू भने आगामी ३० गतेका चुनावबाट आउने जनप्रतिनिधिको कार्यकाल सुरु भएपछि मात्र सकिने छ ।