गण्डकी गाउँपालिकामा जसपाबाट वडाध्यक्षहरुको उम्मेद्वार टुंगो लाग्यो (सूचीसहित)

काठमाडौं – जनता समाजवादी पार्टी (जसपा) गोरखाले गण्डकी गाउँपालिकाको ६ नम्बर वडाबाहेक सबै वडाका उम्मेद्वारहरुको छनौट गरेको छ। शनिबार दर्बुङमा आयोजित एक कार्यक्रमकाबीच उम्मेद्वारहरु छनौट गरिएको हो।

यहि आउँदो वैैशाख ३० गते हुन गइरहेको स्थानीय तह निर्वाचनमा जसपाले गाउँपालिका र ६ नम्बर वडाबाहेक सबै वडामा उम्मेद्वार छनौट गरेको जसपा प्रदेशसभा सदस्य एवं गण्डकी गाउँपालिका इन्चार्ज भीम श्रेष्ठले बताए।

१ नम्बर वडामा ऋषी घिमिरे, २ नम्बर वडामा धन वहादुर प्रजा, ३ नम्बर वडामा अर्जुन अंगाईं, बिष्णु अंगाईं र गोविन्द पन्त (मध्ये सहमतिमा एकजना), ४ नम्बर वडामा सुजन पन्त, पाँचमा निर्मल परियार र मेघ वहादुर थापा (मध्ये सहमतिमा एकजना), सातमा रामकुमार रेग्मी र आठमा कुमार गुरुङको नाम छनौट भएको छ।

पालिका अध्यक्ष र उपाध्यक्ष उम्मेद्वार छनौट केही दिनमा हुने श्रेष्ठले बताए। पालिका अध्यक्षको लागि भीम श्रेष्ठ र कुमार तिवारीको नाम चर्चामा छ। तिवारी अघिल्लो साल (२०७४) को स्थानीय चुनावमा तत्कालिन नयाँ शक्तिबाट अध्यक्षमा उठेका थिए।

तिवारी अघिल्लोपटक चुनावमा प्रतिस्पर्धा गरेको कारण श्रेष्ठलाई पार्टीले टिकट दने सम्भावना रहेको छ। पछिल्लो समय श्रेष्ठले आफ्नो क्षेत्रमा राम्रो पकड बनाएका छन्। त्यसैले सत्ताघटक दलहरुले गाउँपालिकामा आफूलाई सहयोग गर्नुपर्ने श्रेष्ठको भनाइ छ।

सत्ताघटक दलहरु चुनावमा मिलेर जाने सहमति गरेका छन्। गोरखामा नेपाली काँग्रेस र नेकपा माओवादी केन्द्र, एकीकृत समाजवादी सत्तागठबन्धनमा छन्। त्यहि भएर गोरखाको गण्डकी गाउँपालिका जसपाले नछाड्ने श्रेष्ठले बताए।

यस्तै कार्यक्रममा निर्वाचन परिचालन कमिटी समेत गठन गरिएको छ। भीम श्रेष्ठको संयोजकत्वमा १०१ सदस्य कमिटी र नारायण पन्तको संयोजकत्यवमा १०१ सदस्यीय युवा परिचालन कमिटी गठन भएको छ।

त्यस्तै कुमार तिवारीको संयोजकत्वमा आर्थिक परिचालन कमिटी गठन भएको छ। सदस्यहरुमा मन्जु थापा मगर, गोविन्द पन्त, रामकुमार श्रेष्ठ, चेवन देवकोटा, ईश्वरविक्रम घिमिरे रहेका छन्।

यस्तै कार्यक्रममा ईश्वर घिमिरेको संयोजकत्वमा प्रचारप्रसार कमिटी गठन भएको छ। जसमा सुजन पन्त र सन्जित दुवाडी सदस्य रहेका छन्। यस्तैनिर्वाचव घोषणापत्र लेखन कमिटी गठन समेत भएको छ।

कुमार तिवारीको संयोजकमा भिम श्रेष्ठ, कुमार गुरुङ, राम प्रसाद न्यौपाने सदस्य रहेका छन्। निर्वाचन लक्षित गठन भएको कमिटीहरुले आइतबारदेखि काम सुरु गर्ने जिल्ला अध्यक्ष यानप्रसाद भट्टले बताए।

कार्यक्रम जसपा केन्द्रीय सदस्य एवं प्रतिनिधिसभा सदस्य ज्ञानेन्द्र कुमालको प्रमुख आतिथ्यतामा, जिल्ला अध्यक्ष यानप्रसाद भट्टको बिशेष उपस्थितिमा गाउँपालिका अध्यक्ष यमदत्त दुवाडीको सभापतित्वमा सम्पन्न भएको थियो।