कलम चिह्नबाट नै चुनावमा विजयको सुरुवात भइसक्याे : अध्यक्ष नेपाल

काठमाडाैं – सत्ता साझेदार नेकपा (एकीकृत समाजवादी) का अध्यक्ष माधवकुमार नेपालले कलम चिह्न लिएर राष्ट्रिय सभा चुनावमा विजयको सुरुवात भइसके बताएका छन् । अध्यक्ष नेपालले चुनावमा विजयको सुरुवात भइसकेकाे भन्दै सूर्य चिह्न नहुँदैमा आउँदाे चुनावमा कुनै अप्ठ्यारो नपर्ने दाबी गरेका हुन् ।

पार्टी निकट मजदुरहरूको सङ्गठन एकीकृत ट्रेड युनियन महासङ्घ नेपालले आज शुक्रवार काठमाडाैंमा आयोजना गरेको एक कार्यक्रममा बोल्दै उनले भने, ‘हामीले राष्ट्रिय सभामा कलम चिह्नले विजयको सुरुवात गरिसक्याैँ । तर कतिपयलाई सूर्य चिह्न नहुँदा अप्ठ्यारो पर्छ कि भन्ने लाग्ला । कलम चिह्नले जित्न थालिसकेको छ । राष्ट्रिय सभा सदस्य चुनावमा एउटाबाहेक सबैलाई जिताएर देखाएका छौँ । अब स्थानीय तहकाे चुनावमा हामी जुट्नुपर्नेछ ।’

अध्यक्ष नेपालले केपी ओली नेतृत्वको एमालेलाई गफाडीको संज्ञा दिए । उसले सरकारमा हुँदा पनि गफबाहेक अरू केही पनि काम नगरेको उनको भनाइ थियो ।