कांग्रेसले आज प्रतिनिधि सभा विघटनविरूद्ध देशैभर प्रदर्शन गर्दै
कागजपत्र |
काठमाडौँ – प्रमुख प्रतिपक्षी दल नेपाली कांग्रेसले आज देशका १६५ वटै निर्वाचन क्षेत्रबाट सरकारको विरोध प्रदर्शन गर्ने भएको छ। प्रधानमन्त्री केपी शर्मा ओलीले प्रतिनिधि सभा विघटन गरेको विरोधमा कांग्रेसले सडकबाट प्रदर्शन गर्न लागेको हो।
प्रदर्शनका लागि कांग्रेसका शीर्ष नेताहरू आफ्नो निर्वाचन क्षेत्र पुगेका छन्। सभापति शेरबहादुर देउवा डडेलधुरा गएका छैनन्। देउवाले भक्तपुरको कार्यक्रमलाई सम्बोधन गर्ने कार्यक्रम तय भएको छ।
वरिष्ठ नेता रामचन्द्र पौडेल तनहुँको दुइटा कार्यक्रमलाई सम्बोधन गर्न पुगेका छन्।काठमाडौँको कोटेश्वरमा हुने प्रदर्शनपछिको सभालाई प्रवक्ता विश्वप्रकाश शर्माले सम्बोधन गर्ने कार्यक्रम तय भएको छ।
केन्द्रीय सदस्य गगन थापाले नेपालगञ्जको सभालाई सम्बोधन गर्ने कार्यक्रम छ।काठमाडौँका दश निर्वाचन क्षेत्रका विभिन्न १५ ठाउँमा आज प्रदर्शन र सभा हुनेछ। अधिकांश प्रदर्शन दिउँसो १ बजेदेखि सुरू हुने कांग्रेसले जनाएको छ।
कांग्रेस मुख्य सचिव कृष्णप्रसाद पौडेलले दिएको जानकारीअनुसार केन्द्रीय सदस्यहरू आफ्नो गृह जिल्लामा हुने कार्यक्रममा सहभागी हुने तय भएको छ।
