राजनीतिबाट छिटो भन्दा छिटो विदा भएर संस्मरण लेख्न मन छ : प्रचण्ड

काठमाडौं – नेकपा माओवादी केन्द्रका अध्यक्ष पुष्पकमल दाहाल प्रचण्डले यूवाहरु नेतृत्वलिन तयार नहुँदासम्म आफु राजनीतिबाट विदा हुँने सम्भावना नरहेको बताएका छन् ।

शनिबार आयोजित योङ कम्युनिस्ट लिग (वाईसीएल)को राष्ट्रिय भेलामा अध्यक्ष प्रचण्डले आफू छिटो भन्दा छिटो राजनीतिबाट विदा हुने चाहना भए पनि युवाहरु तयार नहुँदासम्म सुख पाउने सम्भावना नरहेको बताएका हुन् । उनले ‘छिटो भन्दा छिटो विदा भएर संस्मरण लेख्न मन छ’ ‘तर, तपाईहरु तयार नहुँदासम्म मैले सुख पाउने छाँट छैन ।’

उनले राष्ट्रिय राजनीतिमा अरु पार्टी भन्दा माओवादी अलग देखिनुपर्ने पनि बताए । युवाहरु तयार भएपछि आफू अलि भिन्न भूमिकामा जाने तयारीमा रहेको प्रचण्डले बताए । जनयुद्धको समयमा भन्दा युवाहरु स्खलित भएको भन्दै प्रचण्डले अहिलेका युवा पद र प्रतिष्ठाको पछि लागेको बताए ।

यता, वाईसीएलको अध्यक्षमा कास्कीका सुमन देवकोटाको सम्भावना बलियो बनेको छ। बरिष्ठ उपाध्यक्ष वीरु तामाङले संगठनको नेतृत्व छाड्ने भएपछि देवकोटाको सम्भावना बढेको हो।

सम्भावित मध्येमा सिनियर रहेका कारण देवकोटाले नेतृत्वको मौका पाउन लागेका हुन्। महासचिब सुबोध शेर्पालीले पनि दाबी गरे पनि माओबादी नेतृत्वले सिनियरलाई नै अध्यक्षको जिम्मेवारी दिने तयारी गरेको बताइन्छ।