सानी भेरी हाइड्रोमा अर्थमन्त्री शर्माको लगानी, उर्जामन्त्री हुँदा लाइसेन्स दिएवापत ठूलो शेयर

काठमाडौं– अर्थमन्त्री जनार्दन शर्माले सानी भेरी हाइड्रो पावरमा लगानी गरेको खुलेको छ।

अस्ट्रेलियामा केन्द्रीय कार्यालय राखी विश्वभरी शिक्षा क्षेत्रमा कन्सल्टेन्सीको व्यापार गरिरहेको एक्सपर्ट एजुकेशन र भिसा सर्भिसका सञ्चालकसँगको ‘पार्टनरसीप’मा अर्थमन्त्री शर्माले हाइड्रो पावर कम्पनीमा लगानी गरेको खुलेको हो।

उर्जामन्त्री रहेका बेला रुकुममा रहेको सानी भेरीको लाइसेन्स शर्मामार्फत एक्स्पर्ट एजुकेशनका सञ्चालक बद्री अर्याल र सञ्जिव शर्माले लिएका थिए जसवापत शर्मालाई ठूलो परिमाणको शेयर दिइएको छ।

नेकपा माओवादीका अध्यक्ष पुष्पकमल दाहाल प्रचण्ड दोस्रो पटक प्रधानमन्त्री हुँदा शर्मा उर्जामन्त्री थिए। अहिले शेरबहादुर देउवाको मन्त्रिपरिषदमा माओवादीका तर्फबाट अर्थ मन्त्रालयको जिम्मेवारी शर्मालाई दिइएको छ।

शर्माको उक्त लगानीको मेलोमेसो उनका भाई तथा काठमाडौं–१बाट प्रतिनिधि सभा चुनावमा स्पर्धा गरेका अनिल शर्माले मिलाएको उच्च स्रोतको दाबी छ।

‘संसारभरी नै शिक्षाको व्यापार गरी अस्ट्रेलियामा बस्ने बद्री अर्याल र सञ्जिव शर्मासँगको पार्टनरसीप छ, उक्त हाइड्रोको लाइसेन्स दिलाएवापत ठूलो शेयर अर्थमन्त्री शर्माको आफन्तका नाममा राखिएको छ’, स्रोतले भन्यो।

सानी भेरी हाइड्रोको क्षमता दुई भागमा विभाजन गरी २३ र ४४ मेगावाटमा अध्ययन सफल गरी निर्माण सुरु गरिएको छ। लाइसेन्स दिने प्रक्रियामा माओवादीका प्रभावशाली भनिएका नेता तथा अर्थमन्त्री शर्माको पहल रहेको थियो।

यो हाइड्रोपावरको लगानी लगभग एक हजार करोड बराबरको अनुमान गरिएको छ।

शर्मा उर्जामन्त्री हुँदा नेपाल विद्युत प्राधिकरणको कार्यकारी निर्देशकमा कुलमान घिसिङलाई ल्याएको र लोडसेडिङ हटाउने काममा सक्रिय रहेको भनी चर्चामा थिए। तर, एकातिर कुलमानको कामका कारण कार्यकाललाई सफल बनाउँदै गर्दा शर्माले कयन हाइड्रोपावर कम्पनी सञ्चालकलाई अनुमतिपत्र वितरण गरेको तथ्य खुल्न थालेको छ।

‘लाइसेन्स दिएका कयन कम्पनीसँग शेयर अथवा त्यो दिन नसके शेयर प्रतिशत बराबरको रकमको हिस्सेदारी माग हुन्थ्यो’, उच्च स्रोतले भन्यो,‘अहिले पनि कतिपयमा आफन्तको नाममा ठूलो परिमाणमा मन्त्री शर्माको शेयर छ।’

शर्मा माओवादीमा रुकुमबाट नै चुनाव जितेर प्रतिनिधि सभा सदस्य बनेका हुन्। पछिल्लो पटक नेकपा विभाजन भएपछि शर्माको नेतृत्वमा नै रुकुममा आम सभा गरिएको थियो।

मन्त्री शर्मा पछिल्लो पटक विवादमा तानिएका छन्। शिक्षाका व्यापारी उमेश श्रेष्ठलाई स्वास्थ्य राज्यमन्त्री बनाएपछि उनीसँगको व्यावसायीक नाता शर्मासँग जोडिएको छ।

ललितपुरको झम्सिखेलमा शर्मालाई श्रेष्ठले नै निवासका लागि घर उपहार दिएका छन् भने माओवादीको बालाजुस्थित अस्पताल श्रेष्ठलाई शर्माले विक्रि गरेको सतहमा चर्चा छ। श्रेष्ठसँग पनि कतिपय हाइड्रोलगायतका लगानीमा शर्माको साझेदारी रहेको अनुमान गरिन थालिएको छ।