डोरीले बाँधेर युवकलाई कुट्ने जाजरकोटका वडाअध्यक्ष पक्राउ

जाजरकोट – डोरीले बाँधेर स्थानीय एक युवकलाई कुट्ने जाजरकोटको जुनीचाँदे गाउँपालिका-२ का वडाध्यक्ष रामबहादुर नेपाली पक्राउ परेका छन् । साउन १५ गते सोही ठाउँका स्थानीय सर्पे दमाईलाई डोरीले बाँधेर कुटपिट गर्ने उनलाई बिहीबार जाजरकोट प्रहरीले पक्राउ गरेको हो

जाजरकोट प्रहरीले उनलाई सोधपुछका लागि भन्दै कुनै जाहेरी बिनै सदमुकाम ल्याइएको जनाएको छ । स्थानीयलाई कुटेको भिडियोका आधारमा वडाध्यक्षलाई पक्राउ गरिएको प्रहरी स्रोतको भनाइ छ । जाजरकोटका प्रहरी निरीक्षक खुमानन्द पाण्डेका अनुसार बुधबार साँझ पञ्चाला प्रहरी चौकीको टोलीले उनलाई घरबाटै नियन्त्रणमा लिएको हो ।

उनले कुटपिट गरेको दृश्यसहितको भिडियो सामाजिक सञ्जालमा भाइरल भएको छ ।

प्रहरीका अनुसार पीडित युवालाई पनि जिल्लामा बोलाइएको छ । यद्यपि, पीडितले अहिलेसम्म ती वडा अध्यक्षविरुद्ध जाहेरी भने दिएका छैनन् ।