पार्टी एकता नै पहिलाे प्राथमिकता : नेपाल पक्ष
कागजपत्र |
काठमाडौं – एमालेका वरिष्ठ नेता माधवकुमार नेपाल निकट सांसदहरुले वर्तमान सरकारमा सहभागी हुनुपर्नेमा जोड दिएका छन् ।
बुधबार बुद्धनगरस्थित सहाना प्रधान स्मृति प्रतिष्ठानको भवनमा भएको छलफलमा उपस्थित अधिकांश सांसदले सरकारमा सहभागी हुनुपर्ने मत राखेका हुन् ।
सकेसम्म पार्टी एकतालाई नै पहिलाे प्राथमिकतामा राख्न सुझाव दिएको सांसद भवानी खापुङले बताए । ‘पार्टी एकता हुन्छ वा हुन्न भन्ने कुरा अध्यक्ष केपी शर्मा ओलीमै भर पर्छ । तर एकता अगाडि हाम्रो शर्त पूरा हुनुपर्छ भन्नेमा एकमत भयौं’, उनले भने ।
सांसदहरुको सुझाव सुनेपछि नेता नेपालले भने अरु नेताहरुसँग पनि कुरा गरेर निर्णय लिने बताएका छन् । ‘केन्द्रीय कमिटीमा पनि यसबारे छलफल हुन्छ । सवैको सुझाव सुनिरहेको छु’, नेता नेपालले भने ।
सहभागी सांसदहरुका अनुसार, माधव नेपालले एकता वा विभाजनबारे ठोस कुरा केही पनि राखेनन् । ‘छलफल चलिरहेको छ । तपाईंहरुको सुझाव मानेरै अगाडि बढ्छु भन्नुभएको छ’, सांसद खापुङले भने । नेता नेपालले आफू निकट स्थायी कमिटी, जनसंगठन, सांसद सहित नेताहरु अलगअलग छलफल गरिरहेका छन् ।
त्यस्तै आफ्नो भनाइ राखेर छलफलबाट बाहिरिएका सांसद मेटमणि चौधरीले आफूहरुको एकै स्वर रहेको जानकारी दिएका छन् । ‘सबै जनाले सरकारमा सहभागी हुनुपर्छ भन्नु भएको छ । हामी सबै एक छौं । उहाँ (माधव नेपाल) ले पनि सरकारमा सहभागी नहुने भनेर अहिलेसम्म भन्नु भएको छैन’, उनले भने ।
आफूहरु सरकारमा सहभागी नहुने पक्षमा भनेर बाहिर आएको कुरा गलत रहेको उनले बताएका छन् । छलफलमा नेता नेपालसहित १९ सांसद उपस्थित थिए । प्रतिनिधिसभामा प्रधानमन्त्री शेरबहादुर देउवालाई विश्वासको पक्षमा मतदान गरेका एमाले सांसदले छलफल गरेका हुन् । देउवाको पक्षमा नेपाल निकट २२ सांसदले मत हालेका थिए ।
तीमध्ये तीन सांसद भने काठमाडौं बाहिर रहेकाले छलफलमा सहभागी नभएको बताइएको छ । यसैबीच आज बालुवाटारमा बसेको सत्तारुढ गठबन्धनको वैठकमा सहभागी नेपाल पक्षीय नेता विजय पौडेलले आफूहरु सरकारमा सहभागी नहुने बताएका थिए ।
