प्रचण्डलाई सुरक्षाकर्मीः कार्यविधि ल्याएर ओलीले खोसेका थिए, मापदण्ड मिचेर देउवाले थपिदिए

काठमाडौं– तत्कालिन प्रधानमन्त्री केपी शर्मा ओलीले कार्यविधि जारी गर्दै पूर्वप्रधानमन्त्रीलगायत विशिष्ट व्यक्तिका लागि खटाइएका सुरक्षाकर्मी घटाएका थिए। तर नेपाली कांग्रेसका सभापति शेरबहादुर देउवा प्रधानमन्त्रीमा नियुक्त हुनासाथ अन्यको छाडी पूर्वप्रधानमन्त्री समेत रहेका गठबन्धन दल नेकपा माओवादी केन्द्रका अध्यक्ष पुष्पकमल दाहाल प्रचण्डलाई मापदण्ड मिचेर प्रहरी नायव उपरिक्षक (डिएसपी)को कमान्डमा शनिबारबाट थपिदिएका छन्।

गृह मन्त्रालयले पटके निर्णयका आधारमा डिएसपी विनोद घिमिरेको नेतृत्वमा प्रचण्डका लागि सुरक्षा टोली खटाएको छ। जवकि, कार्यविधिले प्रचण्डलाई उक्त संख्यामा सुरक्षा प्रदान गर्दैन।

अति विशिष्ट तथा विशिष्ट व्यक्तिको सुरक्षासम्बन्धी मापदण्ड २०७७ जारी गर्दै प्रचण्डको सुरक्षामा रहेका ५५ जना फिर्ता गरेको थियो । १८ जनामा सीमित गरिएको थियो । पूर्वप्रधानमन्त्रीका लागि सशस्त्र प्रहरीबाट १६ र नेपाल प्रहरीबाट २ जना खटाउने मापदण्ड छ । तर गृह मन्त्री बालकृष्ण खाँडलाई देउवाको निर्देशनपछि सचिव महेश्वर न्यौपानेको सचिवस्तरीय निर्णयले प्रचण्डलाई थप सुरक्षाकर्मी पठाइएको हो। एक दर्जन भन्दा बढी सुरक्षाकर्मी प्रचण्डका लागि तत्काल थपिएको छ। अब प्रचण्डको सुरक्षामा प्रहरीको गाडी अगुवा र सशस्त्रको गाडी पछुवाका रूपमा खटिनेछ।

सरकारले २०७७ फागुन पहिलो साताबाट प्रहरी र सशस्त्र प्रहरीले पूर्वअति विशिष्ट, विशिष्ट व्यक्ति र पहुँचवालाको सुरक्षामा खटिएका मापदण्डभन्दा बढी सुरक्षाकर्मी फिर्ता गरेको थियो।

प्रहरीले यसरी सुरक्षाकर्मी थपिनुलाई सुरक्षा थ्रेटको शीर्षकमा राखेर बुझ्न भनेको छ। यद्यपि नयाँ कार्यविधि नबनाई मनोपोली हिसाबले सुरक्षाकर्मी खटाउनुलाई कतिपयले शक्तिको दुरुपयोग भनेका छन्।