वैदेशिक रोजगारीको नाममा ५० लाख ठगी, पाँच जना पक्राउ

काठमाडौं-  आकर्षक तलबको प्रलोभन देखाएर वैदेशिक रोजगारीमा पठाइदिने बहानामा सर्वसाधारणबाट रकम ठगी गरेको आरोपमा पाँच जना पक्राउ परेका छन्।

पक्राउ पर्नेहरूमा बागलुङ काठेखोला गाउँपालिका–३ का २२ वर्षीय सन्दीप थापा मगर, काठमाडौं महानगरपालिका–३ का ४३ वर्षीय निरबहादुर कार्की, सर्लाही चक्रघट्टा गाउँपालिका–२ का ३९ वर्षीय विजयकुमार यादव, काठमाडौं चन्द्रागिरी नगरपालिका–५ का चिरञ्जिवी अधिकारी तथा रामेछाप लिखु तामाकोशी गाउँपालिका–१ का ३० वर्षीय प्रवेश गुरुङ रहेका छन्।

प्रहरीका अनुसार उनीहरूले माल्टा, क्रोएसिया, क्यानडा र मकाउजस्ता देशमा आकर्षक रोजगारी दिलाइदिने भन्दै विभिन्न व्यक्तिहरूबाट ५० लाख रुपैयाँभन्दा बढी रकम असुलेको प्रारम्भिक अनुसन्धानबाट खुलेको छ।

ठगीमा संलग्न आरोपितहरूलाई थप अनुसन्धान तथा आवश्यक कारबाहीका लागि वैदेशिक रोजगार विभागको जिम्मा लगाइएको प्रहरीले जनाएको छ।