गृहमन्त्री गुरुङमाथि छानबिन गर्न कांग्रेसको माग

काठमाडौं-  नेपाली कांग्रेसले गृहमन्त्री सुधन गुरुङमाथि उठेका आरोपहरूको विषयमा तुरुन्त, स्वतन्त्र र निष्पक्ष अनुसन्धान गर्न सरकारसँग माग गरेको छ।

सोमबार विज्ञप्ति जारी गर्दै कांग्रेसले गुरुङसँग सम्बन्धित पछिल्लो प्रकरणले सार्वजनिक चासो मात्र होइन, राजनीतिक नैतिकता र पारदर्शितासँग जोडिएको गम्भीर प्रश्न उठाएको जनाएको छ।

विज्ञप्तिमा भनिएको छ, ‘यस्तो अवस्थामा सम्बन्धित पदमा रहँदै अनुसन्धान प्रक्रियामा प्रत्यक्ष वा अप्रत्यक्ष प्रभाव पर्ने आशंका उत्पन्न हुनु स्वाभाविक हो। त्यसैले अनुसन्धानलाई स्वतन्त्र, निष्पक्ष र प्रभावरहित बनाउन आवश्यक वातावरण सुनिश्चित गरिनुपर्छ भन्ने हाम्रो स्पष्ट धारणा छ।’

कांग्रेसले गृहमन्त्रीसँग सम्बन्धित सम्पूर्ण आरोपहरूको उच्चस्तरीय छानबिन प्रक्रिया तत्काल सुरु गर्न सरकारसमक्ष औपचारिक माग गरेको छ।

त्यस्तै, ढिलासुस्ती, प्रभाव वा ढाकछोपतर्फ लैजाने कुनै पनि प्रयासले सुशासन, नैतिकता र जनविश्वासमा गम्भीर क्षति पुर्‍याउने चेतावनी पनि दिएको छ।