यसै साता युद्ध सकिँदैन, तर छिट्टै अन्त्य हुन्छ : ट्रम्प
कागजपत्र |
काठमाडाैं- संयुक्त राज्य अमेरिका का राष्ट्रपति डोनाल्ड ट्रम्पले इरानसँग जारी अमेरिकी–इजरायली युद्ध यसै साता समाप्त हुने सम्भावना कम रहेको बताएका छन्। तर उनले द्वन्द्व छिट्टै अन्त्य हुने दाबी भने दोहोर्याएका छन्।
ह्वाइट हाउस मा सोमबार पत्रकारहरूसँग कुरा गर्दै ट्रम्पले युद्ध तत्कालै टुंगिने सम्भावना नरहेको उल्लेख गर्दै ‘चाँडै अन्त्य हुनेछ’ भन्ने विश्वास व्यक्त गरे। “धेरै समय लाग्दैन, यो छिट्टै सकिन्छ,” उनले भने।
ट्रम्पले होर्मुज जलडमरूमध्य हुँदै गुड्ने जहाजहरूको सुरक्षाका लागि प्रस्ताव गरिएको अमेरिकी नेतृत्वको गठबन्धनमा सामेल हुन तयार भएका देशहरूको नाम चाँडै सार्वजनिक गर्ने पनि जानकारी दिए। विश्वको करिब २० प्रतिशत तेल आपूर्ति हुने यो समुद्री मार्गलाई अत्यन्त संवेदनशील मानिन्छ।
यद्यपि, उक्त सुरक्षा गठबन्धनमा धेरै अमेरिकी सहयोगी राष्ट्रहरूले स्पष्ट समर्थन जनाएका छैनन्। केही देशले सहभागी हुन अस्वीकार गरेको भन्दै ट्रम्पले युरोपेली साझेदारहरूको अनिच्छाप्रति आलोचना समेत गरेका छन्।
यसैबीच, युरोपेली सङ्घकी शीर्ष कूटनीतिज्ञ काया कालास ले ब्रसेल्समा बोल्दै युरोप लामो समयसम्म चल्ने युद्धको पक्षमा नरहेको स्पष्ट पारेकी छन्। उनले यो युरोपको प्रत्यक्ष युद्ध नभए पनि यसको प्रभाव युरोपका हितसँग जोडिएको उल्लेख गरिन्।
संयुक्त राज्य अमेरिका र इजरायल ले फेब्रुअरी २८ देखि इरान माथि व्यापक आक्रमण सुरु गरेका थिए। त्यसयता द्वन्द्वका कारण अन्तर्राष्ट्रिय जलमार्गमा ढुवानी प्रभावित हुनुका साथै तेलको मूल्य वृद्धि र विश्व अर्थतन्त्रमा अस्थिरता बढेको बताइएको छ।
