टेक्सासकाे भीषण बाढी: ८२ को मृत्यु, दर्जनौं बेपत्ता

टेक्सास — दक्षिण–मध्य अमेरिकी राज्य टेक्सासमा शुक्रबार बिहान आएको विनाशकारी बाढीले कम्तीमा ८२ जनाको ज्यान लिएको छ, भने ४० भन्दा बढी अझै बेपत्ता छन्।

राज्यका २० काउन्टी बाढीबाट प्रभावित भएका छन्। तीमध्ये सबैभन्दा धेरै क्षति केर काउन्टीमा भएको छ, जहाँ मात्रै ६८ जनाको मृत्यु पुष्टि भएको छ। मृतकमध्ये २१ जना बालबालिका छन्।

स्थानीय बासिन्दा र उद्धार टोली बाढीपछिको विनाशसँग जुझिरहेका छन्। प्रभावित क्षेत्रमा घरहरू भत्किएका, रुखहरू उखेलिएका र सडकहरू हिलोले पुरिएका छन्। सडक चिन्हहरू समेत मेटिएको अवस्थामा छन्।

धेरै सवारी साधन बाढीले बगाएर सडकको छेउमा अडिएका छन्, तीमध्ये धेरैको झ्याल फुटेका र ढाँचा बाङ्गिएका छन्।

बाढीले क्षेत्रका सयौं घरहरूमा गम्भीर क्षति पुर्‍याएको छ। प्रभावित बस्तीहरू पूर्णरूपमा घेरिएका छन् भने उद्धार तथा राहतकार्य तीव्र रूपमा चलिरहेको छ।