बंगलादेशकी पूर्वप्रधानमन्त्री शेख हसिनालाई ६ महिनाको जेल सजाय

ढाका — बंगलादेशकी पूर्वप्रधानमन्त्री शेख हसिनालाई अदालतको अवमाननासम्बन्धी मुद्दामा ६ महिनाको जेल सजाय सुनाइएको छ। न्यायाधीश मोहम्मद गोलाम मोर्तुजा मजुमदारको नेतृत्वमा रहेको तीन सदस्यीय इजलासले बुधबार यस्तो फैसला सुनाएको हो।

मुद्दा गत वर्ष अक्टोबरमा गाइबान्धा जिल्लाको गोबिन्दगञ्जका नेता शाकिल अकन्द बुलबुलसँग भएको शेख हसिनाको कथित टेलिफोन संवादमा आधारित छ। सामाजिक सञ्जाल र सञ्चारमाध्यममा व्यापक रूपमा भाइरल भएको उक्त अडियोमा हसिनाले आफूविरुद्ध दायर २२७ वटा मुद्दाले “२२७ जनालाई मार्ने अनुमति दिएको” भन्ने विवादास्पद अभिव्यक्ति दिएकी थिइन्।

अदालतले सोही मुद्दामा शाकिल अकन्द बुलबुललाई पनि दुई महिनाको जेल सजाय सुनाएको छ। बुलबुल सत्तारूढ दल अवामी लिगको विद्यार्थी संगठन छत्र लिगका नेता हुन्।

शेख हसिना सन् १९९६ देखि २००१ र २००९ देखि २०२४ सम्म बंगलादेशको प्रधानमन्त्री भइन्। सन् २०२४ को अगस्टमा विद्यार्थी आन्दोलन र हिंसात्मक प्रदर्शनपछि उनी देश छाडेर भारतमा निर्वासनमा गइन्।

हाल हसिनामाथि १५२ वटा मुद्दा दायर छन्। तीमध्ये १३५ हत्या, ७ मानवताविरुद्धका अपराध र नरसंहार, ६ हत्या प्रयास, ३ अपहरण र १ विपक्षी दल बीएनपीमाथिको आक्रमणसम्बन्धी छन्। यिनै मुद्दामा उनका सरकारका वरिष्ठ अधिकारीहरू समेत संलग्न छन्।

हाल शेख हसिना भारतको नयाँ दिल्लीस्थित सुरक्षित स्थानमा बसेकी छन्। बंगलादेश सरकारले उनलाई फिर्ता गर्न भारतसँग औपचारिक अनुरोध गरिसकेको छ। तर हसिनाले आफूमाथिको अभियोगलाई राजनीतिक प्रेरित भन्दै अस्वीकार गरेकी छन्।

अदालतको यो निर्णयले बंगलादेशको राजनीतिमा गहिरो प्रभाव पार्ने अपेक्षा गरिएको छ। सत्तारूढ अवामी लिग पार्टी हाल प्रतिबन्धित अवस्थामा छ भने नोबेल शान्ति पुरस्कार विजेता मुहम्मद युनूसको नेतृत्वमा अन्तरिम सरकार सञ्चालनमा रहेको छ।