नेशनल हेल्थकेयरका दुई औषधि बजारबाट हटाइँदै

काठमाडौं – औषधि व्यवस्था विभागले बजारमा गुणस्तरहीन भेटिएका दुई ब्याचको औषधिको उत्पादन र बिक्रीमा प्रतिबन्ध लगाएको छ। बारा स्थित नेशनल हेल्थकेयर द्वारा उत्पादित ब्याच नम्बर सीएलएलएच २३०१२ र सीएलएलएच २३०१४ का क्याल्सिफर ड्रप औषधिमा न्यून गुणस्तर देखिएपछि विभागले ती औषधि बजारबाट तुरुन्त फिर्ता लिन निर्देशन दिएको हो। औषधि ऐन, २०३५ को दफा १४ अनुसार बिक्री वितरणमा रोक लगाइएको जनाउँदै विभागले औपचारिक सूचना जारी गरेको छ। विभागले ती ब्याचका औषधि अब प्रयोग तथा सिफारिस नगर्न सर्वसाधारण र स्वास्थ्यकर्मीहरूलाई आग्रह गरेको छ। साथै, ती औषधि फिर्ता लगिएको विवरण विभागमा पेश गर्न सम्बन्धित उत्पादन कम्पनीलाई निर्देशन दिइएको छ।