सदर चिडियाखानाबाट रेडपान्डा चोरीको प्रयास

काठमाडौं — ललितपुरस्थित सदर चिडियाखानामा मंगलबार राति दुर्लभ प्रजातिको रेडपान्डा चोरी गर्ने प्रयास भएको खुलासा भएको छ। चिडियाखानाभित्र रहेको एक घरमा रेडपान्डा चोरी गर्न दुई युवाले प्रवेश गर्न खोजेको चिडियाखाना प्रशासनले जनाएको छ।

चोरी प्रयासपछि चिडियाखानाले जिल्ला प्रहरी परिसर ललितपुरमा उजुरी दिएको छ। प्रहरीका अनुसार घटनाको सीसीटीभी फुटेजमा ती युवाहरू चोरी प्रयास गर्दै गरेको स्पष्ट देखिएको छ।

ललितपुर प्रहरी प्रमुख एसएसपी श्यामकृष्ण अधिकारीका अनुसार ती युवाहरू कसरी चिडियाखानाभित्र प्रवेश गरे र उनीहरूको परिचय के हो भन्नेबारेमा हाल अनुसन्धान भइरहेको छ।

प्रहरीले घटनाबारे थप जानकारी संकलन गरिरहेको छ भने चिडियाखानामा सुरक्षा व्यवस्थासमेत कडा बनाइएको जनाइएको छ।