कागजपत्र |
काठमाडौं- सरकार र नेपाल चिकित्सक संघबीच सहमति भई आन्दोलन स्थगन भए पनि आवासीय चिकित्सकहरू भने अझै आन्दोलनमै छन्। उनीहरूले सरकारसँग कुनै सहमति नभएको भन्दै आफ्ना माग पुरा नहुँदासम्म संघर्ष जारी रहने बताएका छन्।
आवासीय चिकित्सकहरूको नेतृत्वमा रहेको ‘स्वास्थ्यकर्मीका लागि सुरक्षित कार्यस्थल संघर्ष समिति’ले सरकारले पारिश्रमिक, सेवा सुविधा र कार्यस्थल सुरक्षासम्बन्धी समस्याहरूलाई वेवास्ता गरेको आरोप लगाउँदै आन्दोलन यथावत् रहेको स्पष्ट पारेको छ।
समितिका अनुसार चिकित्सा शिक्षा आयोगले निर्णय गरेअनुसारको पारिश्रमिक तीन महिनादेखि नपाएका चिकित्सकहरूलाई सरकारले निर्देशन त दिएको छ, तर कार्यान्वयनको कुनै गम्भीर प्रयास नगरेको भन्दै उनीहरू असन्तुष्ट छन्।
शनिवार राति जारी विज्ञप्तिमा समितिले भनेको छ, “निर्देशन र सहमतिको नाटक गर्नुको सट्टा समस्याको वास्तविक समाधानमा सरकार किन गम्भीर छैन?”
आन्दोलनरत चिकित्सकहरूले ८औं तहको (४८ हजार रुपैयाँ) मासिक तलब बराबरको निर्वाह भत्ता, निश्चित ड्युटी समय, र कार्यस्थलको सुरक्षा सुनिश्चित हुनुपर्ने माग गरेका छन्।
नेपालका विभिन्न मेडिकल कलेजमा आवासीय र अन्य चिकित्सकहरू ३२ दिनदेखि यिनै माग राखेर आन्दोलनरत छन्।
