‘सर्वोच्च अदालतका न्यायाधीशहरुको मोबाइल रेकर्ड मनिटरिङ हुनुपर्छ’

काठमाडौं- स्वतन्त्र सांसद डा. अमरेशकुमार सिंहले सर्वोच्च अदालतका न्यायाधीशहरुको मोबाइल रेकर्ड मनिटरिङ हुनुपर्ने माग गरेका छन् । आज (आइतबार) बसेको प्रतिनिधिसभाको बैठकमा सम्बोधन गर्दै सांसद सिंहले यस्तो बताएका हुन् ।

‘आज एउटा राष्ट्रिय दैनिकमा न्यायपालिकाको सन्दर्भमा सम्पादकीय छ । न्यायपालिकाको नियुक्ती प्रक्रियादेखि न्याय सम्पादनसम्म पनि व्यक्ति व्यक्तिअनुसार फरक छ । पहुँचअनुसार फरक छ । यसले जनताको विश्वास कहाँ लग्छ ?’ उनले भने–’जसरी सरकारले पनि पहुँचको आधारमा विभिन्न निर्णय गर्छ , त्यसैगरि न्यायपालिकाले गर्न थाल्यो भने त्यसमा प्रश्न उठ्नु आँफैमा दुःखद् कुरा हो ।’

‘सर्वोच्च अदालतका न्यायाधीशहरुको मोबाइल रेकर्ड मनिटरिङ हुनुपर्छ, कि कुन नेताको पहुँच र प्रभावको आधारमा निर्णय प्रभावित हुने गर्छ भनेर । न्यायापालिकामा नियुक्ती भागबण्डामा भैरहेको छ । तर, भागबण्डामा निर्णय गर्ने कुरा दुःखद् हो । यसले देशको न्याय प्रणालीमाथि नै प्रश्न उठाउँछ ’ उनले अगाडि भने ।