नक्कली घ्यू बेच्ने पूजा सामाग्री प्रोडक्ट उद्योग सिल

वीरगन्ज- वीरगन्जमा अखाद्य बस्तु बेचबिखन गरेको भन्दै स्थानीय प्रशासनले एक उद्योगमा सिलबन्दी गरेको छ । वीरगन्ज महानगरपालिका ६ मा रहेको पूजा सामाग्री प्रोड्क्ट उद्योगमा जिल्ला प्रशासन कार्यालय पर्सा र नाप तौल विभागको संयुक्त टोलीले सिलबन्दी गरेको हो ।

सो उद्योगले विभिन्न ब्रान्ड राखेर नक्कली घ्यू तथा पाउडर बेचबिखन गरेको आरोप स्थानीय प्रशासनले लगाएको छ । उद्योगमा छापा मार्दा धेरै परिमाणमा पाउडरको दूध र नक्कली घ्यू उत्पादन भइरहेको पाइएको पर्साका प्रमुख जिल्ला अधिकारी दिनेश सागर भुसालले जानकारी दिए ।

उनका अनुसार उद्योगले आफैँ उत्पादन गरेको डाल्डा घ्यूलाई विभिन्न ब्रान्डको नाम दिएर बजारमा बेचबिखन गरिरहेको पाइएको छ ।  संयुक्त टोलीले सञ्चालक कृष्णकुमार सर्राफलाई पक्राउ गरेको जिल्ला प्रशासन कार्यालय पर्साले जनाएको छ ।