सञ्चार मन्त्रालयमाथि गृहको ठाडो हस्तक्षेप, सञ्चारमाध्यमलाई अंकुश लगाउन निर्देशन !

काठमाडौं – गृह मन्त्रालयले देशभरका ७७ वटै जिल्ला प्रशासन कार्यालय दिएको निर्देशनमा सञ्चारमाध्यमलाई समेत अंकुश लगाउने गरी सूचना तथा सञ्चार मन्त्रालयमाथि हस्तक्षेप गरेको छ ।

बिहीबारको मन्त्रीपरिषद्को निर्णय भन्दै गृहद्वारा जारी २१ बुँदे निर्देशनको २.१ मा गृहले अनलाइन समाचार पोर्टलहरुमाथि निगरानी बढाउने निर्णय गरेको छ । अनलाइन न्यूज पोर्टलहरु सञ्चार मन्त्रालयअन्तर्गतको सूचना विभाग र प्रेस काउन्सिल मातहत रहने व्यवस्थालाई गृहमन्त्रालयले हस्तक्षेप गरेको छ ।

मन्त्रालयद्वारा दिइएको निर्देशनमा भनिएको छ, ‘अनलाइन न्यूज पोर्टल, फेसबुक, ट्वीटरलगायत सामाजिक सञ्जाल र छापा माध्यमबाट अर्नगल, आधारहीन, भ्रामक सन्देशहरु प्रचार प्रसार गर्ने, जातीय सांस्कृतिक, सदभाव भड्काउने, राष्ट्रिय एकता, अखण्डता, सार्वभौमिकतामा आँच आउने सामाग्री राख्ने, कुनै व्यक्तिको गोपनियताको हक अतिक्रमण गर्ने, सार्वजनिक प्रतिष्ठान र सम्मानमा नोक्सान पुग्ने गरी अभिव्यक्ति दिने, अश्लिलता प्रवद्र्धन गर्ने जस्ता कार्यहरु नियन्त्रण गरी दोषीलाई कारबाही गर्न जिल्ला प्रहरी कार्यालय र जिल्ला प्रशासन कार्याल्यमा एक एक जना अधिकृत स्तरको कर्मचारी खटाई डेस्क सञ्चालन गर्ने । यस प्रकारका कार्यमा संलग्न उपर प्रचलित कानुन बमोजिम काबराही गरी सो को सार्वजनिकरण गर्ने ।’