परराष्ट्र सचिव पौडेल क्यानडाको राजदूतमा सिफारिस
कागजपत्र |
काठमाडौँ – परराष्ट्र मन्त्रालयका सचिव भरतराज पौडेल क्यानडाका लागि नेपाली राजदूतमा सिफारिस भएका छन् ।
मन्त्रिपरिषद् बैठकले पौडेललाई मन्त्रीसरहको मर्यादासहित क्यानडाको राजदूतमा नियुक्तिका लागि सिफारिस गरेको हो ।
मंसिरमा अवकाश हुन लागेका पौडेल न्युयोर्कस्थित संयुक्त राष्ट्रसङ्घको स्थायी प्रतिनिधिका लागि दाबेदार थिए । यसअघिको प्रचलन तथा योग्यता तथा क्षमताका आधारमा पनि उनको स्वाभाविक दाबेदारी थियो ।
तर, सरकारले त्यहाँ सहसचिव लोकबहादुर थापालाई पठाएपछि पौडेलमाथि अन्याय भएको टिप्पणी भइरहेका बेला मन्त्रीसरहको मर्यादामा रहने गरी क्यानडाको राजदूत सिफारिस गरिएको एक मन्त्रीले बताए ।
पौडेलको संसदीय सुनुवाइलगायतका प्रक्रिया टुङ्गिँदा सचिवको पूरै कार्यकाल सकेरमात्र राजदूत हुनेछन् । उनीपछि मन्त्रालयको सचिवमा सेवा लम्सालको सम्भावना छ ।
