शिक्षकले यौन दुर्व्यवहार गरेको भन्दै मकवानपुरमा विद्यालय तोडफोड

मकवानपुर – शिक्षकले छात्रामाथि यौन दुर्व्यवहार गरेको भन्दै विद्यार्थीले मकवानपुरमा विद्यालय तोडफोड गरेका छन्।

बागमती गाउँपालिका-८ फापरबारीमा रहेको जनता माध्यमिक विद्यालयमा अध्ययनरत छात्राहरूलाई यौन दुर्व्यवहार गरेको भन्दै विद्यार्थीले मंगलबार विद्यालय तोडफोड गरेको इलाका प्रहरी कार्यालय फापरबारीले जानकारी दिएको छ।

कक्षा चारदेखि आठ सम्मका विद्यार्थीमाथि गलत तरिकाले छुने गरेको भन्दै विद्यार्थीहरूले तीन जना शिक्षकविरूद्ध निवेदन दिएका थिए। उनीहरूले गत हप्ता नै विद्यालयमा निवेदन दिँदा पनि कुनै कारबाही नगरेको भन्दै विद्यालय तोडफोड गरेको प्रहरीले जनाएको छ।

प्रहरीका अनुसार सोही विद्यालयका शिक्षक लोकबहादुर बिक, रूद्रबहादुर बिक र हेमबहादुर बिकमाथि दुर्व्यवहार गरेको आरोप छन्।