जगदम्बा स्पिनिङ्ग मिल्समा आगलागी, ४ करोड रुपैयाँ बराबरकाे क्षति

रूपन्देही – विद्युत शर्ट सर्किट भइ आगलागी हुँदा ४ करोड रुपैयाँ बराबर क्षति भएको सौरभ ग्रुप अन्तर्गतको जगदम्बा स्पिनिङ मिल्स लिमिटेडले जानकारी दिएको छ ।

रूपन्देहीको कमहरियास्थित स्पिनिङ मिल्समा हिजो (बुधबार) आगलागी भएको थियो । उद्योगको टीएफओ मेसिन, विद्युत प्यानल र विद्युतीय तारहरू नष्ट भएको मिल्सले जनाएको छ ।

उद्योगमा लागेको आगो सिद्धार्थ नगरपालिका र लुम्बिनी संस्कृति नगरपालिकाका दुईवटा दमकल, प्रहरी तथा उद्योगभित्र रहेका आगो निभाउने संयन्त्र प्रयोग गरी नियन्त्रणमा लिइएको पनि उद्योगले जानकारी दिएको छ ।

उद्योगमा कार्यरत ६५० भन्दा बढी कामदार तथा कर्मचारीबीच भागदौड हुँदा पाँचजना कर्मचारी सामान्य घाइते भएका छन् । उद्योगमा सौरभ ग्रुपले ३ अर्ब रुपैयाँ लगानी गरेको जनाएको छ ।