भारतीय ट्रकको ठक्करबाट युवकको मृत्यु


रूपन्देही – कपिलबस्तुमा भारतीय ट्रकको ठक्करबाट एक युवाको मृत्यु भएको छ। आइतबार साँझ कपिलवस्तुको ओदारीमा नम्बर नखुलेको भारतीय ट्रकले ठक्कर दिँदा स्थानीय अनिल मगरको मृत्यु भएको हो।

घटनाको विरोधमा आइतबार साँझ स्थानीय र मृतक युवकका आफन्तले कपिलवस्तुको बाणगंगा ११ ओदारीमा प्रदर्शन गरेका छन्। स्थानीयको भिड र प्रदर्शनलाई नियन्त्रणमा लिन अश्रुग्याँससमेत प्रहार गर्नुपरेको जिल्ला प्रहरी कार्यालय कपिलवस्तुले जनाएको छ।

मोटरसाइकलमा सवार मगरलाई तीव्र गतिमा रहेको ट्रकले ठक्कर दिएको पत्यक्षदर्शीले बताएका छन्। मगरको घटनास्थलमै मृत्यु भएको प्रहरीले जनाएको छ।

ठक्कर दिएपछि ट्रकले मगरलाई करिब ५० मिटर जति घिसार्दै लगेको प्रत्यक्षदर्शीले बताएका छन्।

दुर्घटनापछि ट्रक र त्यसका चालकलाई प्रहरीले पक्राउ गरेर कारबाही प्रक्रिया अघि बढाएको छ।

प्रतिक्रिया