११ वर्षभन्दा कम उमेरका बालबालिकाले कहिले पाउँछन् खाेप ?

काठमाडौं – वर्तमान सरकारले ०७८ चैत मसान्तसम्म कोभिड–१९ विरुद्धको खोप लगाउनयोग्य सबै नागरिकलाई खोप लगाइसक्ने लक्ष्य लिएको छ । पछिल्लो महिनायता खोप लगाएको ६ महिना पूरा भएका सबै नागरिकलाई अतिरिक्त खोप (बुस्टर डोज) पनि दिइँदै आएको छ ।

तर, अझै पाँचदेखि ११ वर्षसम्मका बालबालिकाले कोभिड–१९ विरुद्धको खोप पाएका छैनन् । सरकार ४० लाख बालबालिकाका लागि खोप खरिद गर्न उदासीन बनेको छ ।

झन्डै ६८ प्रतिशत खोप अनुदानबाट 
नेपालमा यही फागुन १० गतेसम्म चार करोड ७८ लाख दुई हजार ८०० डोज कोभिड–१९ विरुद्धको खोप भित्रिएको छ । जसमध्ये झन्डै ६८ प्रतिशत खोप अनुदानमा प्राप्त भएको स्वास्थ्य सेवा विभागको व्यवस्थापन महाशाखाको तथ्यांक छ ।

नेपालले पहिलोपटक ०७७ फागुनमा भारतको सिरम इन्स्टिच्युट अफ इन्डियासँग २० लाख डोज कोभिसिल्ड खोप प्रतिडोज चार डलरका दरले खरिद गरेको थियो । जसमध्येको १० लाख डोज खोप ०७८ असोजमै आइपुगेको थियो ।

सरकारले ०७८ साउनमा चीनको सिनोर्फाम कम्पनीसँग गोप्य सम्झौतामार्फत ४० लाख डोज र गत असोजमा एसियाली विकास बैंकको ऋण सहयोगमा ६० लाख डोज भेरोसेल खोप खरिद गरेको थियो । त्यस्तै, विश्वबैंकको ऋण सहयोगमा थप ३६ लाख ५१ हजार डोज खरिद गरी ल्याएको थियो । यसबाहेक नेपाललाई सबै खोप ग्लोबल भ्याक्सिन अलायन्स गाभी कार्यक्रम, विश्व स्वास्थ्य संगठनको कोभ्याक्स सुविधाअन्तर्गत तथा विभिन्न देशको सहयोगमार्फत आएको छ ।