जंगलमा खेर जाने सालको पातका टपरी-दुना बनाउन सिकाउँदै नगरपालिका

रामेछाप – रामेछाप नगरपालिकाले नगर भित्रका महिलालाई मेसिनको प्रयोगबाट दुना टपरी बनाउन सिकाउन थालेको छ । नगरले नगर भित्रका ९ वटै वडा बाट एक प्रतिनिधि छनौट गरि दुना टपरी बनाउन सिकाउन थालेको हो ।

जंगलमा खेर जाने सालको पातलाई प्रयोग गरेर व्यवसायिक उत्पादनसँग जोड्ने योजना अनुसार दुना टपरी बनाउन सिकाईएको रामेछाप नगरपालिकाका उपप्रमुख सृजना खड्का बताउँछिन ।

उनी भन्छिन्- ‘अहिले प्लास्टिकको प्लेट प्रयोग गर्दा वातावरणलाई समेत असर पारेको छ र नागरिकको पैसा समेत खर्च भएको छ । यो तालिम पछाडी नगरका नागरिकहरूले दुना र टपरी प्रयोग गर्नेछन् र आम्दानी समेत हुनेछ ।अब नगरमै दुना टपरी बनाउने उद्योग सन्चालन गर्छौँ ।’

१५ दिनसम्म सन्चालन हुने मेसिनद्धारा दुना टपरी बनाउने सीप विकास तालिमका प्रशिक्षक सरिता बुढा मगर हुन् । उनले सहभागी महिलालाई दुना टपरीसँगै आधुनिक चारकुने र पाँच कुने विभिन्न शैलीका टपरी बुन्न सिकाउने बताउँछिन ।