डा. रेग्मी भ्रष्टाचार र आर्थिक अनियमिततामा संलग्न छन्ः छानबिन उपसमिति

काठमाडाैं – सरकारले गठन गरेको छानबिन उपसमितिले नेपाल पर्यटन बोर्डका कार्यकारी प्रमुख डा. धनञ्जय रेग्मीले भ्रष्टाचार र आर्थिक अनियमिततामा संलग्न रहेको निष्कर्ष निकालेको छ । उपसमितिले डा. रेग्मीलाई कारबाहीका लागि अख्तियार दुरुपयोग अनुसन्धान आयोगलाई पत्राचार गर्न पनि सिफारिस गरेको छ ।

डा. रेग्मी विदेशबाट आउँदा तोकिएभन्दा बढी मदिरा ल्याएको र विमानस्थलका अध्यागमनका कर्मचारीलाई हातपात गरेको विवादमा मुछिएका थिए । त्यसपछि उनीविरुद्ध छानबिन गर्न पर्यटन मन्त्रालयले पर्यटन बोर्डका उपाध्यक्ष चन्द्रप्रसाद रिजालको संयोजकत्वमा उपसमिति बनाएको थियो ।

उपसमितिले डा. रेग्मीमाथि आर्थिक अनियमितता गरेको, सुनचोरी पैठारीमा संलग्न रहेको र विमानस्थलमा कर्मचारीलाई दुर्व्यवहार गरेको आरोप पुष्टि भएको जनाएको छ । त्यसैले रेग्मी पर्यटन बोर्डको कार्यकारी प्रमुख पदमा रहिरहन उपयुक्त नहुने उपसमितिको सुझाव छ ।

साथै, आर्थिक अनियमितता लगायत आरोपमा कारबाहीका लागि थप अनुसन्धान गर्न अख्तियार दुरुपयोग अनुसन्धान आयोगमा पत्राचार गर्नुपर्ने पनि उपसमितिले जनाएको छ । रिजाल नेतृत्वको उपसमितिले सोमबार मन्त्रालयका सचिवलाई प्रतिवेदन बुझाएको हो ।