अध्यागमनका कर्मचारीले ड्युटीको बेला अब व्यक्तिगत मोबाइल प्रयोग गर्न नपाउने
कागजपत्र |
काठमाडाैँ – त्रिभुवन विमानस्थलको अध्यागमन कार्यालयका कर्मचारीले कार्यालय समयमा अब व्यक्तिगत मोबाइल प्रयोग गर्न नपाउने भएका छन्।
भिजिट भिसामार्फत हुने मानव तस्करीमा कर्मचारीको मिलेमतोको आशंका बढेपछि अध्यागमन प्रशासनले मोबाइल प्रयोगमा रोक लगाएको हो ।
विगत केही दिनदेखि ड्युटीमा रहेका कर्मचारीको व्यक्तिगत मोबाइल लकरमा राख्न थालिएको छ । कसैले अत्यावश्यक परेमा वरिष्ठ अध्यागमन अधिकृतको स्वीकृतिमा मात्र मोवाइल प्रयोग गर्न पाइने अध्यागमन कार्यालयका प्रमुख पुष्पराज शाहीलेले जानकारी दिए।
व्यक्तिगत मोवाइलमा फोन गर्न नपाए पनि ल्यान्डलाइन फोन र सरकारी मोबाइल भने कर्मचारीले प्रयोग गर्न पाउँछन् ।
भिजिट भिसामा ठूलो संख्यामा नेपालीहरू खाडीका देश र मलेसिया पुगेको खुलेपछि कर्मचारीमाथि निगरानी बढाइएको अध्यागमन प्रशासनले जनाएको छ।
विभिन्न मोबाइल एप्लिकेसनमा भिजिट भिसामा विदेश जानेको विवरण पठाएर सेटिङ हुँदै आएको प्रारम्भिक छानबिनमा खुलेपछि व्यक्तिगत मोबाइल प्रयोगमा रोक लगाइएको हो।
