बजारमा पाइँदैन, स्वास्थ्य मन्त्रालय भन्छ : सिटामोलसहित सबै औषधि पर्याप्त छ

काठमाडौँ – सरकारले कोरोना भाइरसको उपचारका लागि आवश्यक पर्ने सबै औषधि र उपकरण पर्याप्त रहेको जनाएको छ। स्वास्थ्य तथा जनसङ्ख्या मन्त्रालयका सहप्रवक्ता डा।समिरकुमार अधिकारीले कोरोना भाइरसको विरुद्ध उपचार गर्ने औषधि र उपकरण पर्याप्त रहेको जानकारी दिएका हुन्।

हाल नेपालमा सिटामोललगायत कुनै पनि औषधिको अभाव नरहेको उनले दाबी गरे। ‘स्वास्थ्य सेवा विभागको आपूर्ति व्यवस्थापन महाशाखासँग १० लाख र सरकारी फार्मेसीमा एक करोडभन्दा बढी सिटामोल छ,’ अधिकारीले बुधबार आयोजित नियमति पत्रकार सम्मेलनमा भने।

मन्त्रालयले सिटामोललगायत औषधिको तत्काल अद्यावधिक गर्नका लागि सबै सरकारी अस्पताल, प्रादेशिक स्वास्थ्य आपूर्ति व्यवस्थापन केन्द्रलाई निर्देशन दिइरहेको छ।

‘यदि कुनै सरकारी अस्पतालका सिटामोल औषधि कम हुन आएमा नेपाल औषधि लिमिटेडसँगै सिधै सम्झौता गरी खरिद गर्न सकिने छ’, अधिकारीले भने, ‘सोहीअनुसार औषधि खरिद गरी बिरामीलाई सहज बनाउन हुन सबै सरकारी अस्पताललाई अनुरोध छ।’

अधिकारीका अनुसार स्वास्थ्य सेवा विभागले पनि सिटामोललगायत अन्य अत्यावश्यक औषधिको पनि खरिद प्रक्रिया अगाडि बढाइसकेको छ । ठूला अस्पताल र प्रादेशिक अस्पताललाई पनि अत्यावश्यक औषधिको खरिद प्रक्रिया अगाडि बढाउनसमेत मन्त्रालयले अनुरोध गरेको छ।