केन्द्रले गर्यो ८०० जनाको सफल मिर्गौला प्रत्यारोपण
कागजपत्र |
भक्तपुर – भक्तपुरस्थित सहिद धर्मभक्त राष्ट्रिय प्रत्यारोपण केन्द्रले हालसम्म ८ सय जनाको मिर्गौला प्रत्यारोपण गरेको छ।
वि.सं २०६९ माघ ६ गतेदेखि मिर्गौला प्रत्यारोपण सुरु गरेको केन्द्रले नौ वर्षको अवधिमा यो सफलता हासिल गरेको केन्द्रका कार्यकारी निर्देशक डा पुकार चन्द्र श्रेष्ठले बताए।
वरिष्ठ मिर्गौला तथा कलेजो प्रत्यारोपण सर्जन डा पुकारचन्द्र श्रेष्ठ, वरिष्ठ नेफ्रोलोजिष्ट डा कल्पना श्रेष्ठ, प्रमुख कन्सल्टेन्ट युरोलोजिष्ट तथा प्रत्यारोपण सर्जन प्रा डा राकेशकुमार बर्मा, एनेस्थेसियोलोजिष्ट डा आरती राई, निमित्त नर्सिङ निर्देशक कोपिला दाहालको टोलीले मिर्गौला प्रत्यारोपण गरेको हो।
हालसम्म सम्पन्न गरेको प्रत्यारोपणमा अङ्गदातातर्फ शत प्रतिशत सफलता हासिल गरेको र मिर्गौला प्रत्यारोपणतर्फ ९८ प्रतिशत सफलता प्राप्त भएको केन्द्रका कार्यकारी निर्देशक श्रेष्ठले जानकारी दिए।
