भारतमा दुईजना महिला पत्रकार पक्राउ

काठमाडौं – भारतका धार्मिक रूपमा उत्प्रेरित हिंसाजन्य समाचार संकलन गर्न गएका दुई जना पत्रकार पक्राउ परेका छन्। घटना भारतको उत्तरपूर्वी राज्यको हो।

भारतीय सञ्चारमाध्यमका अनुसार धार्मिक रूपमा उत्प्रेरित हिंसाजन्य समाचार संकलन गर्न गएका डिजिटल न्यूज नेटवर्कका दुई जना महिला पत्रकारलाई प्रशासनले पक्राउ गरेको जनाइएको छ।

त्रिपुरा राज्यमा यसै महिना भएका दक्षिणपन्थी प्रदर्शन र मस्जिद तोडफोडका समाचारको रिपोर्टिङ गर्न जाँदा उनीहरु पक्राउ परेका हुन्। राज्य सरकारले भने धार्मिक हिंसाका समाचार गलत रहेको बताएको छ।

भारतको गृह मन्त्रालयले त्रिपुरामा मस्जिदहरू तोडफोड गरिएको रिपोर्टहरू ‘असत्य’ र ‘तथ्यहरूको पूर्ण तवरले गलत व्याख्या’ भएको बताएको छ। यता त्रिपुरा प्रहरीले सामाजिक सञ्जालमा एकजना पत्रकारले पोष्ट गरेको भिडियोलाई प्रहरीको अनुसन्धानबाट प्रमाणित हुन नसकेको झुठो समाचार भनेको छ।

पक्राउ परेका महिला पत्रकारहरु समृद्धि के सकुनिया र स्वर्ण झाले आक्रमणमा परेका भनिएका त्रिपुराका केही मस्जिदहरूको भ्रमण गर्दै आगलागीबाट क्षतिग्रस्त मस्जिद र इस्लाम धर्मको पवित्रग्रन्थ कुरान जलाइएको फुटेज सामाजिक सञ्जालमा पोष्ट गरेको आरोप प्रहरीको आरोप छ।

त्रिपुरामा तीन दिन रहँदा पत्रकार सकुनियाले आफ्नो रिपोर्टिङका केही अभिलेख र भिडियोहरू र ट्विटरमा पोष्ट गरेकी थिइन्। एउटा पोष्टमा सकुनियाले मुस्लिम पुरुषहरूको समूहसँग बोल्दै गरेको फोटो देखिन्छ भने मस्जिद तोडफोड गरिएको तस्बिरहरू समेत हालेकी छन्।

त्रिपुरासँग सीमा जोडिएको अर्को राज्य आसामका प्रहरी अधिकारीहरूले आइतबारर दिल्ली फर्कने क्रममा ती महिला पत्रकारलाई रोकेका थिए। त्रिपुरा प्रहरीले सोमबार बिहान उनीहरूलाई लिन नआउन्जेल रातभर पुलिस स्टेशनमा थुनेका थिए।

२० वर्ष उमेरका ती दुई पत्रकारलाई आपराधिक षड्यन्त्र, साम्प्रदायिक असमानता फैलाएको र शान्ति भंग गरेको अभियोग लगाइएको छ। तर अदालतले सकुनिया र झालाई सोमबार दिउँसै जमानतमा रिहा गरिसकेको छ।

उनीहरूका वकिलले कुनै आपराधिक उद्देश्य नभएको भन्दै इजलाससमक्ष मुद्दा खारेजीको लागि आग्रह गरेका थिए। पत्रकार सकुनियाले ट्वीटरमा लेख्दै आफू र झालाई समाचार लुकाउने हिसाबले हिरासतमा राखिएको बताएकी छन्।