मुख्यमन्त्री राईले मागे विश्वासको मत

विराटनगर – प्रदेश १ का मुख्यमन्त्री राजेन्द्र राईले विश्वासको मत मागेका छन् । प्रदेश १ प्रदेशसभा बैठकलाई सम्बोधन गर्दै बुधबार मुख्यमन्त्री राईले संसदमा विश्वासको मत मागेका हुन् ।

कात्तिक ३० गते मंगलबार नै विश्वासको मत लिने कार्यसूची रहे पनि नेपाल बन्दको कारण देखाउँदै प्रमुख प्रतिपक्षी दल नेकपा (एमाले)का सांसदहरू अनुपस्थित भएपछि सभामुखले बुधबारसम्मका लागि बैठक स्थगित गरेका थिए ।

आज बसेका प्रदेश नं १ को प्रदेश सभाको बैठकमा मुख्यमन्त्री राईले नेपालको संविधानको धारा १६८ को उपधारा ४ बमोजिम विश्वासको मत मागेका छन् । गत कार्तिक १६ गते गठबन्धनको समर्थनमा राई मुख्यमन्त्रीमा नियुक्त भएका थिए । मुख्यमन्त्री नियुक्त भएको १ महिनाभित्र विश्वासको मत लिने कानुनी व्यवस्था अनुरुप विश्वासको मत लिन लागेका हुन् ।