दाेहाेराे अंकले घट्यो नेप्से, परिसूचक २८ सय १९.८६ विन्दुमा

काठमाडौं – आज सोमबार नेपाल स्टक एक्सचेञ्ज (नेप्से) मा १८ अंकले घटेको छ । गत साता लगातार बढेर २ सयभन्दा बढी अंकले उकालो लागेको नेप्से परिसूचक आज घटेको हो । शेयर बजार परिसूचक नेप्से आज १७ दशमलव ७५ अङ्कले घटेर दुई हजार आठ सय १९ दशमलव ८६ विन्दुमा झरेको छ ।

नेपाल राष्ट्र बैंकले कात्तिक ३ गते निक्षेपको ब्याजदर नबढाउन वाणिज्य बैंकहरुलाई निर्देशन दिएपछि बजार उकालो लाग्न थालेको थियो । लगानीकर्ताले त्यसयता कमाएको नाफा बुक गरेपछि आज नेप्से परिसूचक घटेको हो ।

परिसूचक घटे पनि ७ अर्ब ७७ करोड रुपैयाँ बराबरको कारोबार भइ १ करोड ३४ लाख कित्ता सेयर किनबेच भएको छ । बजार घटेको दिन बैंक, होटल र टुरिजम तथा लगानी समूहमा भने सुधार आएको छ । ती बाहेक सबै समूहमा गिरावट आएको छ ।