मोदीका कट्टर आलोचक कम्युनिस्ट नेता कन्हैया कुमार भारतीय कांग्रेसमा किन छिर्दैछन्?

काठमाडौं– कम्युनिस्ट पार्टी अफ इन्डिया (सीपीआई)का युवा नेता कन्हैया कुमार भारतीय कांग्रेसमा प्रवेश गर्ने तय भएको छ। २८ सेप्टेम्बरमा उनी भारतीय कांग्रेसबाट राजनीतिक यात्रा तय गर्ने समाचारहरूमा जनाइएको छ।

भारतीय प्रधानमन्त्री नरेन्द्र मोदीका कट्टर आलोचक कन्हैया कुमार जवाहरलाल नेहरु विश्वविद्यालयको विद्यार्थी संगठनको अध्यक्ष पनि भइसकेका छन्। उनको राजनीतिक उदय विद्यार्थी आन्दोलनले नै गराएको थियो।

विहारको बेगुसराय भन्ने ठाउँका कन्हैया कुमार पछिल्लो चुनावमा भारतीय जनता पार्टी (भाजपा)का नेता गिरीराज सिंहसँग पराजित भएका थिए। चुनावअघि उनको विद्रोही भाषणले खुबै चर्चा पाएको थियो।

विद्यार्थी आन्दोलनताका मोदीको विरोध तथा प्रदर्शन गर्नेमा उनी अग्रपंक्तिमा हुन्थे। उनलाई चीनसँग मिलेको भनी भाजपाका नेताले आरोप लगाउने गर्दथे। यस्तै पाकिस्तानको पक्षमा बोलेको भन्दै कन्हैया कुमारलाई राज्य द्रोहको मुद्दा लगाइएको थियो।

पछिल्लो लोक सभा चुनावमा पराजित भएपछि विहारबाट केन्द्रीय राजनीतिमा छलाङ मार्नका लागि कन्हैयाले कांग्रेस रोजेका हुन्। कम्युनिस्ट मतदाता कम भएको र पार्टीको प्रभाव पनि कमजोर हुँदै गएपछि कन्हैया कुमारले कांग्रेसलाई रोजेका हुन्।

उनको चुनाव प्रचारका लागि दक्षिण भारतीय अभिनेता प्रकाश राजलगायत पनि बिहार पुगेका थिए।