सरकारले भोलिसम्म बजेट खर्च गर्न नपाउने
कागजपत्र |
काठमाडौं – प्रतिनिधिसभाबाट बजेट पारित भए पनि सरकारले भोलिसम्म बजेट खर्च गर्न नपाउने भएको छ ।
प्रतिनिधिसभाबाट आज पारित बजेट (विनियोजन विधेयक) कार्यान्वयन हुन राष्ट्रियसभाले पारित गर्नुपर्छ र प्रतिनिधिसभामा फर्काउनुपर्छ । सभामुखले सो विधेयकलाई राष्ट्रपतिकहाँ पठाउनुपर्छ र राष्ट्रपतिले प्रमाणीकरण गरेपछि मात्रै सरकारले राष्ट्रिय ढुकुटी (सञ्चित कोष) चलाउन पाउँने व्यवस्था रहेको छ ।
यो प्रकृया पूरा हुन कम्तिमा मंगलबारसम्म कुनुपर्नेछ । राष्ट्रियसभा बैठक भोलि दिउँसो १ बजे बस्नेगरी बोलाइएको छ ।
यस हिसाबले नेपालमा पहिलोपटक निम्तिएको सरकारी खर्च शून्यता (गभर्मेन्ट सटडाउन) ४ कार्यदिन लामो हुँदैछ । भदौ ३१ र असोज १ गते सरकारले खर्च गर्न पाएको थिएन । २ र ३ गते सार्वजनिक बिदा भए पनि सोमबार सरकारी कार्यालयहरू खुलेका छन् ।
भोलिको बैठकमा बजेट पारित गर्ने कार्यसूची तय भएमा र पारित गरेर भोलि नै प्रतिनिधिसभामा पठाएमा भने जारी गभर्मेन्ट सटडाउन भोलि नै अन्त्य हुनसक्छ ।
हालको स्थिति हटाउन सभामुखले राष्ट्रिय सभाबाट प्राप्त विधेयक प्रमाणीकरणका लागि भोलि नै राष्ट्रपतिकहाँ पठाउन सक्नेछन् । किनकि, दुई दिनसम्म खर्च गर्न नपाएको सरकारले ‘सटडाउन’ लाई सकेसम्म चाँडै अन्त्य गर्न चाहिरहेको छ ।
