बिलखबन्धले ‘पीडित पौडेल’
कागजपत्र |
काठमाडौं– नेपाली कांग्रेसको १३ औं महाधिवेशनले नेतृत्वमा उदय भएका शेरबहादुर देउवाले १४ औंमा पनि सभापति पदका लागि दाबी गरेका छन्। उनले उक्त पदमा एउटा कार्यकाल बिताउने अभ्यासका लागि विविध रणनीति अख्तियार गरेका छन्।
देउवासँग पराजित भएका तर कांग्रेसभित्रको प्रतिपक्षी नेतृत्व गरिरहेका बरिष्ठ नेता रामचन्द्र पौडेल भने अन्यौलमा छन्। एक हिसाबले उनी आफ्नै समूहभित्र सभापतिका अन्य ‘हेवीवेट’ आकांक्षीका कारण विलखबन्धमा परेका छन्।
देउवा समूहमा रहेका उपसभापति विमलेन्द्र निधिले सभापतिमा लड्ने पूर्वघोषणाअनुसार नै सम्पर्क कार्यालय पनि खोलीसकेका छन्। तर, पौडेल पक्षबाट सभापतिका उम्मेदवार ‘डिक्लियर’ भएको छैन। न त पौडेल आफैंले पनि सभापति पदका लागि घोषणा गरेका छन्।
पटक–पटक क्रियाशील सदस्यताको समस्या समाधानका विषयमा आफ्नो समूहको बैठक त राखेका छन् तर महाधिवेशनमा आगामी नेतृत्व कसले गर्ने भन्ने सन्दर्भमा पौडेल निर्णित हुन सकेका छैनन्।
पौडेल समूहका नेता मानिने पूर्वमहामन्त्री प्रकाशमान सिंह, महामन्त्री डा. शशांक कोइराला र केन्द्रीय सदस्य डा. शेखर कोइरालाले सभापतिमा दाबी गरेका छन्। सिंहले त सभापति पदका लागि पौडेल समूह पनि त्याग गर्न सक्ने बताइसकेका छन्। उता आफू कुनै पनि हालतमा ‘ब्याक’ नहुने शशांकको घोषणा छ भने शेखरले त १३ औं महाधिवेशनपछि नेतृत्वका लागि जिल्ला दौड नै गरेका थिए।
पछिल्लो पटक पौडेल समूहसँग नजिक रहेका तर सभापतिका लागि अघिल्लो महाधिवेशनमा नै मैदानमा उत्रिएका कृष्ण सिटौला फेरि पनि महाभिडन्तमा नेतृत्वका लागि सामेल हुँदैछन्।
‘संसदमा १७ पटक प्रधानमन्त्रीका लागि दौडेर पराजित भएको र महाधिवेशनमा पनि देउवासँग पराजित भएका कारण बरिष्ठ नेता पौडेल अहिले समस्यामा हुनुहुन्छ। चुनावमा पनि तनहुँबाट पराजित भएको चोट पनि छ’, उच्च स्रोतले भन्यो,‘अब महाधिवेशनमा नेतृत्वमा पुग्ने लक्ष्य राखे पनि आफ्नै समूहका बलिया नेताको दाबीले घोषणा गर्न सक्नुभएको छैन।’
त्यसो त पौडेललाई प्रधानमन्त्री वा एउटा सिनियर नेताका रुपमा सक्रिय राजनीतिमा राखेरै सभापतिका लागि सहयोग गर्न डा. शेखर कोइरालाले प्रस्ताव गरेका थिए। त्यसमा पनि पौडेल नाजवाफ भएका थिए। ‘एक पटक पनि नेतृत्वमा नपुगी नेतृत्व हस्तान्तरणको कुरा आएपछि नेता पौडेल मौन हुनुहुन्छ, उहाँलाई अन्य दाबीकर्ताको सहयोग नभए महाधिवेशनमा जित्ने ठाउँ पनि देखिँदैन’, स्रोतले भन्यो,‘बडो बिचित्रको बिलखबन्धमा पर्नुभयो। उहाँले अरुलाई सहयोग गर्ने कुरा पनि गर्नुभएको छैन। उहाँ पीडित भएको जस्तो देखिन्छ।’
