नेकपा (एस) र लोसपामा सनाखत गरेका प्रदेश सांसदले पाए मान्यता
कागजपत्र |
काठमाडौं – निर्वाचन आयोगले नया पार्टी नेकपा (एकीकृत समाजवादी) र लोकतान्त्रिक समाजवादी पार्टीमा सनाखत गरेका प्रदेश सांसदहरूलाई मान्यता दिएको छ ।
नेकपा (एमाले) का प्रदेश नम्बर-१ बाट १०, प्रदेश नम्बर-२ बाट १३, वाग्मती प्रदेशबाट १३, लुम्बिनी प्रदेशबाट एक, कर्णाली प्रदेशबाट तीन, सुदूरपश्चिम प्रदेशबाट १४ गरि कूल ५४ प्रदेश सांसदले (एकीकृत समाजवादी ) रोजेका थिए ।
त्यस्तै, जनता समाजवादी पार्टी (जसपा) का प्रदेश-२ बाट १६ र सुदूरपश्चिम प्रदेशबाट एक सांसदले लोकतान्त्रिक समाजवादी पार्टी (लोसपा) मा सनाखत गरेका थिए । उनीहरूको सनाखतलाई मान्यता दिएर प्रदेशसभा तथा दललाई उक्त जानकारी दिइएको आयोगका सहायक प्रवक्ता कोमलप्रसाद धमलाले जानकारी दिए ।
त्यस्तै स्थानीय तहका प्रतिनिधिले गरेको सनाखतका विषयमा जानकारी गराउने प्रक्रिया थालिएको छ । केही दिनमा नै स्थानीय तहका पदाधिकारीका विषयमा जानकारी गराइने उनले बताए ।
