७७ वर्ष अगाडि दोस्रो विश्वयुद्धमा आफूले झण्डै गोली हानेको परिवारसँग भेटेपछि…

काठमाडौं – अमेरिकी सेनामा आबद्ध रहेका एक भेटेरानले ७७ वर्ष अगाडि दोस्रो विश्व युद्धको समयमा आफूले झण्डै गोली हानेको एउटा परिवारसँग भेट गरेका छन् । उनीहरुको मिलापलाई रोचक मानिएको छ ।

सोमबार ९७ वर्षीय मार्टिन एड्लरले युरोपको भ्रमण गरि ती तीन दाजु बहिनीहरुसँग भेटेर अंकमाल गरेका हुन् जसलाई उनले जर्मन सेना लुकाएको भन्ने ठानेर ७७ वर्ष अगाडि बन्दुक ताकेर मार्न खोजेका थिए । वास्तवमा एड्लरले सो परिवारलाई फेसबुक मार्फत भेटाएका हुन् । उनकी छोरीले युद्धको समयमा एड्लरका अनुभव सहितको कथा फेसबुक पेजमा पोस्ट गरेकी थिइन् ।

उनले लेखेकी छन्, ‘इटलीमा लुकिरहेका जर्मनहरुको खोजी गर्दा मेरा बुवा मार्टिन एड्लरले एउटा ठूलो बास्केट फेला पारेका थिए । त्यो बास्केटबाट आवाज आएपछि उनीहरुले धम्की दिँदै बाहिर निस्कन भने । तर कोही बाहिर नआएपछि उनी गोली हान्न तयार भएका थिए । त्यसै समय एक महिला चिच्याउँदै कोठा भित्र आएर ‘यी केबल बच्चाहरु हुन्’ भनेकी थिइन् ।

ती महिलाले मेरो बुवाको बन्दुक आफ्नो पेटमा राख्दै त्यसो भनिन् । यसपछि ती साना बालबालिकाहरु बस्केटबाट निस्किए । त्यहाँ केही सेकेन्ड मात्र ढिला भएको भए ठूलो दुर्घटना हुने थियो । निर्दोष बच्चाहरुको ज्यान जान्थ्यो । त्यसैले त्यस्तो हुनबाट बचेको खुसीमा मेरो बुवाले ती बच्चाहरुलाई अंकमाल गर्नुभयो र ती महिलासँग उनीहरुको तस्बिर पनि मागेर ल्याउनुभयो । पछिल्लो ७७ वर्षसम्म बुवाले त्यो तस्बिरलाई एकदम सम्हालेर मायाले राख्नु भएको छ र सधैँ उनीहरु कहाँ छन् होला भनेर याद गरिरहनु हुन्छ ।’

यसपछि डिसेम्बरमा उनले त्यो फोटो पनि इन्टरनेटमा पोस्ट गरिन् अनि ती बालबालिकाको पहिचान गर्न दोस्रो विश्व युद्धका भेटेरानहरुसँग अनुरोध गरेकी थिइन् । अन्ततः सामाजिक सञ्जालको जादुले काम गर्यो र उनीहरु इटलीको बोलोग्ना शहरमा फेला परे ।

उनीहरु मध्येको जेठो दाइ ब्रुनो अहिले ८३ वर्षका भइसकेछन् भने दुई दिदी बहिनी गिलाना र मफल्दा क्रमशः ८२ र ७९ वर्ष उमेर पुगेका रहेछन् । उनीहरुले पनि एड्लरसँग समय बिताउन भनेर उनलाई आफ्नो ठाउँमा स्वागत गरे ।

एड्लरले सो तस्बिर लिँदा ब्रुनो ७ वर्षका थिए । सीएनएनसँगको फोन अन्तर्वार्तामा उनले एड्लरसँगको भेटघाटलाई अत्यन्तै सुन्दर क्षण भनेर व्याख्या गरे र उनले दोस्रो विश्व युद्धका अमेरिकी सेना जस्तै गरी आफूहरुलाई चकलेट दिँदा भावुक बनेको पनि स्वीकारे । एड्लरले बोलोग्ना सहित इटलीका अन्य शहरहरुमा पनि आगामी दुई हप्ता बिताउने बताएका छन् । मेलमिलापको तस्बिरमा एड्लर अत्यन्तै खुसी देखिन्छन् । सीएनएनए