दार्चुलाको मालघाटमा गृह मन्त्रालयको टोलीविरुद्ध नाराबाजीसहित स्थानीयद्धारा प्रदर्शन

धनगढी – गत शुक्रबार तुइन तर्ने क्रममा भारतीय एसएसबीले डोरी फुकालिदिएपछि खसेर युवक बेपत्ता भएको घटनाको छानबिन गर्न खटिएको गृह मन्त्रालयको टोलीविरुद्ध दार्चुलाको मालघाटमा नाराबाजीसहित स्थानीयले प्रदर्शन गरेका छन् ।

नदीमा बेपत्ता भएका व्यास गाउँपालिका–२ का जयसिंह धामीका भाइ नरेन्द्रले पीडित पक्षसँग भेटघाट समेत नगरेर भारतीय भूमिबाट घटनास्थलको निरीक्षणका लागि पुगेकाले प्रदर्शन गरिएको बताए । उनीहरूले भारतीय भूमि टेकेर आउने छानबिन समिति मुर्दावाद, गोर्खाली कहिल्यै झुक्दैन, कालापानी लिपुलेक हाम्रै हो जस्ता नारा लगाएका थिए ।

टोली दार्चुला पुगेको तीन दिन पुगिसक्दा पनि पिडित पक्षसँग भेटघाट नगरेको भन्दै गुनासो गरेका छन् । मृतक धामीका भाइ नरेन्द्रले भने ‘घटनास्थलको निरीक्षण गर्नलाई भारतीय भूमि प्रयोग गरेकाले हामीले विरोध गरेका हौं ।’ बिहीबार दिउँसो गृह सहसचिव जनार्दन गौतम नेतृत्वको टोली घटनास्थलको निरीक्षणका लागि सदरमुकाम खलंगाबाट भारतीय बाटो हुँदै गएको थियो । स्थानीयले महाकाली वारि नेपाली भूमिमा प्रदर्शन गर्दा टोलीले पारिपट्टि भारतीय भूमिमा निरीक्षण गरिरहेको थियो ।

त्यस्तै घटनास्थलको स्थलगत निरीक्षणपछि छानबिन टोली सदरमुकाम फर्किएको छ । छानबिन टोलीकी सदस्य समेत रहेकी दार्चुलाकी निमित्त प्रमुख जिल्ला अधिकारी ज्योत्सना भट्टले घटनास्थलको निरीक्षण गरेर फर्किएको बताइन् ।