वन निगमका सीईओ भट्टराईको नियुक्ति खारेज गर्न प्रतिस्पर्धीबाटै सर्वोच्चमा रिट
कागजपत्र |
काठमाडौं – नेपाल वन निगम लिमिटेडका प्रमुख कार्यकारी अधिकृत (सीईओ) रामेश्वर भट्टराईको नियुक्ति खारेज गर्न माग गर्दै सर्वोच्च अदालतमा रिट परेको छ ।
प्रतिस्पर्धामा आफ्नो भन्दा कम नम्बर ल्याएका भट्टराईलाई नियुक्त गरिएको दाबी गर्दै अर्का प्रतिस्पर्धी पंकजकुमार दासले रिट दायर गरेका हुन् ।
केपी शर्मा ओली नेतृत्वको सरकारले भट्टराईलाई गत असार ३ गते सीईओ नियुक्त गरेको थियो । दास र भट्टराई दुवै वनविज्ञानका विद्यार्थी हुन् ।
वन तथा वातावरण मन्त्रालयको खुला प्रतिस्पर्धामा विराटनगर महानगरपालिका-१३ का दासले ७४-३१, बझाङको थलारा गाउँपालिका-६ का रामेश्वर भट्टराईले ४९-६२ र काठमाडौँ महानगरपालिका-१३ का अच्युतराज पहाडीले ३५-८९ नम्बर ल्याएका थिए ।
सर्वोच्च अदालतमा बुधबार दायर भएको रिटमा दासले आफूभन्दा कम नम्बर पाएका भट्टराईको नियुक्ति बदर गर्न अन्तरिम आदेश माग गरेका छन् । उनले प्रधानमन्त्री तथा मन्त्रिपरिषद्को कार्यालय, वन तथा वातावरण मन्त्रालय, मन्त्रालयका सचिव, नेपाल वन निगम लिमिटेड र मन्त्रालयले बनाएको छनोट समितिलाई विपक्षी बनाएका छन् ।
