संवैधानिक आयोगका पदाधिकारी हटाउन प्रचण्डको ‘असफल’ दौडधुप यस्तो छ

काठमाडौं– सत्तारुढ पार्टी नेकपा माओवादी केन्द्रका अध्यक्ष पुष्पकमल दाहाल प्रचण्ड संवैधानिक आयोगका पदाधिकारी हटाउनका लागि गम्भीर दौडधुपमा जुटेका छन्।

मंगलबार विहान संवैधानिक परिषदका अध्यक्ष समेत रहेका प्रधानमन्त्री शेरबहादुर देउवासँग भेट गरेका प्रचण्डले त्यसमा सदस्य रहने प्रतिनिधि सभाका सभामुख अग्नी सापकोटालाई पनि भेट गरेका थिए।

एमाले अध्यक्ष केपी शर्मा ओलीका पालामा नियुक्त भएका सबै पदाधिकारी हटाएर नयाँ सिफारिस गर्नुपर्ने भन्दै प्रचण्डले यस्तो प्रयत्न गरेका हुन्। उनले संवैधानिक परिषद सम्बन्धी संशोधित अध्यादेश प्रतिनिधि सभाबाट खारेज गरी अगाडि बढ्नुपर्ने असफल जुक्ति निकालेको बताइएको छ।

उच्च स्रोतका अनुसार एमालेका नेता माधवकुमार नेपालसँगको सहमतिका आधारमा उनले यस्तो दौडलाई तिव्रता दिएका हुन्। तर प्रचण्डको चाहनाअनुसार तत्कालै ति नियुक्ति खारेज हुने अवस्था भने नरहेको बताइन्छ।

अध्यादेशबाट नियुक्त गरिएका सबै पदाधिकारीले काम थालिसकेको अवस्थामा उनीहरुलाई महाअभियोग लगाउनुभन्दा अर्को विकल्प तत्कालका लागि नरहेको बताइन्छ। तर, सभामुख सापकोटा समेतले सर्वोच्च अदालतमा संवैधानिक परिषद सम्बन्धी संशोधित अध्यादेश र नियुक्तिविरुद्ध सर्वोच्च अदालतमा हालेको रिट विचाराधिन अवस्थामा छन्।

सर्वोच्चले उक्त रिटमा सुनुवाई गरी अध्यादेश खारेज गरे मात्र संवैधानिक निकायका पदाधिकारी हट्न सक्ने विकल्प रहेको अवस्था छ। प्रचण्डले भेट गरेका बेला प्रधानमन्त्री देउवाले अदालतमा विचाराधिन रहेको विषयमा अहिले केही पनि गर्न नसक्ने जवाफ दिएका थिए।

अध्यादेशबारेको निर्णय गर्न सरकारले प्रस्तावका रुपमा प्रतिनिधि सभामा पेश गर्नुपर्छ। ‘प्रचण्ड अहिले त्यसमा सक्रिय छन्। तर प्रधानमन्त्री देउवा अदालतमा विचाराधिन रहेको विषयमा हात हाल्ने पक्षमा हुनुहुन्न’, स्रोतले भन्यो।