प्रधानमन्त्री देउवाले बचन दिएको भोलीपल्टै दिल्लीमा रहेका एमाले नेता खनालले पाए ३० लाख

काठमाडौं– प्रधानमन्त्री शेरबहादुर देउवाले बचन दिएको भोलीपल्ट नै भारतको नयाँ दिल्लीमा उपचार गराइरहेका एमाले नेता एवम् सत्ता सहयोगी झलनाथ खनालले ३० लाख रुपैंया उपचार खर्च पाएका छन्।

नयाँ दिल्लीस्थित नेपाली दूतावासले परराष्ट्र मन्त्रालयमार्फत उक्त रकम हात पारेका हुन्। दिल्लीको एपोलो अस्पतालमा उपचाररत खनालका दुवै मिर्गौला फेर्नुपर्ने भएपछि निवर्तमान प्रधानमन्त्री केपी शर्मा ओलीको मन्त्रिपरिषदले खनाललाई सहयोग गर्ने निर्णय गरेको थियो।

माओवादी केन्द्रका अध्यक्ष पुष्पकमल दाहाल प्रचण्डको निवासमा पुगेका बेला प्रधानमन्त्री देउवाले उपचार खर्च सरकारले दिनेगरी खनालसँग टेलिफोनमा कुराकानी गरेका थिए।

यद्यपि यो रकम अहिलेको सरकारले नभई ओली सरकारले नै निर्णय गरी पठाएको बताइन्छ। यद्यपि खनालले रकम नपाएको गुनासो देउवासँग गरेका थिए।

२ असोज २०७५ देखि लागू भएको जनस्वास्थ्य ऐनको दफा ३० मा ‘प्रचलित कानुनमा जुनसुकै कुुरा लेखिएको भएता पनि कुनै व्यक्तिलाई विदेशमा उपचार गर्नु परेमा सोका लागि लाग्ने खर्च नेपाल सरकारले उपलब्ध गराउने छैन’ भनिएको थियो।

ओली सरकारले उक्त निर्णय गर्नासाथ प्रधानमन्त्री देउवा सभापति रहेको नेपाली कांग्रेसका नेता गगन थापाले कार्यविधि र कानुन सम्झाउँदै त्यसरी रकम दिन नमिल्ने बताएका थिए। देउवाले पनि सहयोगको आश्वासन दिएपछि थापाले हिजो मात्रै उक्त कानुन सम्झाएका थिए।

तर प्रधानमन्त्री देउवाले आश्वासन दिनासाथ परराष्ट्र मन्त्रालयको समन्वयमा दिल्लीस्थित दूतावासले रकम बुझिसकेको छ।