कांग्रेसका ठेकेदार सांसद लामाको कम्पनीले समयमा सडक कालोपत्रे नगरेपछि फोटो टाँसेर बिरोध


काठमाडौं– कांग्रेसका ठेकेदार सांसद जिपछिरिङ लामाको कम्पनीले म्याग्दी सदरमुकाम बेनीदेखि पश्चिम दरबाङ जाने सडक कालोपत्रे समयमा नगर्दा स्थानीयले फोटो टाँसेर विरोध गरेका छन्।

ठेक्का लिएर समयमा काम नसक्दा पहिरोले घर खेतमा क्षति पुराएको भन्दै लामाको फोटो टाँसेर सर्वसाधारणले विरोध जनाएका हुन्।

दोलखाबाट प्रतिनिधिसभा सदस्य निर्वाचित कांग्रेस सांसद लामा सञ्चालक रहेको लामा कन्स्ट्रक्सन र अच्युत खरेल सञ्चालक रहेको समानन्तर कन्स्ट्रक्सनले समयमा काम नगर्दा सडक अलपत्र अवस्थामा छ।

वर्षापछि पहिरोले माथिल्लो क्षेत्रका कम्तीमा १५ घर विस्थापित भयो भने सयौं रोपनी धानखेत बगेको बताएका छन्। उनीहरुले ठेकेदार कम्पनीका मालिकको फोटो विरोध स्वरुप कालो ब्यानरमा राखेका छन्।

पश्चिम मंगला, मालिका र धौलागिरी तथा बाग्लुङको ताराखोला, बुर्तिवाङ जोड्ने बेनी–दरवाङ सडकको पहिलो १२.५ किलोमिटर सडकलाई ११ मिटर चौडा बनाइ ७ मिटरमा कालोपत्रे गर्न ४५ करोड ५३ लाख ७२ हजारमा ठेक्का लिए पनि चार बर्षसम्म काम सकिएको छैन।

बाटो समयमै नबन्दा सयौं घर पहिरोको जोखिममा छन्। सयौंको खेतबारी पहिरोको चपेटामा परेको छ। गाईवस्तु, गोठ पहिरोको चपेटामा छन् । सहज आवतजावत गर्न कठिन, यातायात अवरुद्ध हुँदा बिरामीलाई समयमा अस्पताल पु¥याउन नसकिने अवस्था भएकोले आभारी छौं– विरोध ब्यानरमा लेखिएको छ।

कम्पनीले कालोपत्रे गर्ने गरी ४ असोज ०७४मा ठेक्का सम्झौता गरेको थियो। सडक डिभिजन कार्यालय बागलुङले ठेक्का लगाएको योजना पुस ०७५ मा गण्डकी प्रदेश सरकारलाई हस्तान्तरण भएको थियो।

प्रतिक्रिया