माधव नेपाल सरकारविरुद्ध माओवादी आन्दोलनको प्रतिकारमा यस्तो रहेछ ओलीको ‘डेरा रणनीति’

काठमाडौं– तत्कालिन प्रधानसेनापति रुक्माङ्गत कटवाललाई बर्खास्त गर्ने निर्णय तुहिएपछि तत्कालिन प्रधानमन्त्री तथा माओवादी अध्यक्ष पुष्पकमल दाहाल प्रचण्डले राजीनामा दिएर ‘नागरिक सर्वोच्चता’ आन्दोलन चलाएको थियो।

प्रचण्डको बहिर्गमनपछि एमाले नेता माधवकुमार नेपाल प्रधानमन्त्रीमा निर्वाचित भए। तर माओवादीले उक्त सरकारलाई असफल बनाउनका लागि सिंहदरबार घेराउदेखि नेपाल बन्दसम्मका आन्दोलन गरेको थियो।

उक्त सरकारविरोधी आन्दोलनको प्रतिकार गर्दै जोगाउनका निम्ति हालका प्रधानमन्त्री केपी शर्मा ओलीले डेरा रणनीति अपनाएको उनकी पत्नी राधिका शाक्यले खुलाएकी छन्।

उनको मेरा अनूभुती भन्ने पुस्तकमा सो प्रकरणमा ओलीले माधव नेपालको सरकार जोगाउनका लागि कसरी रणनीति बनाए भन्ने उल्लेख गरेकी छन्। उनले लेखेकी छन्,‘हामी बालकोटको घर छाडी सहरमा डेरा नै बसेका थियौं, केपीजीले सरकार जोगाउन र माओवादी आन्दोलनको प्रतिकार गर्नका निम्ति रणनीति बनाउनुहुन्थ्यो।’

सडकमा आएपछि माधव नेपाल सरकारलाई कठपुतली सरकार भन्दै माओवादी आन्दोलनमा उत्रिएको थियो। प्रचण्डले अभिनेत्री रेखा थापासँग नाचेको प्रकरण पनि सोही बेला बिख्यात बनेको थियो।

निर्वाचित सरकार हटाएर सडकबाट सत्ता ल्याउन माओवादी तम्सिएको थियो। तर, एमाले र युथफोर्सको प्रतिकारले उक्त आन्दोलन लामो समय चल्न सकेन।

२०६६ वैशाख १९देखि सुरु भएको माओवादी आन्दोलन भएको थियो। नभन्दै एक हप्तामै माओवादीले आन्दोलन फिर्ता लियो । माधव नेपालको सरकार थप २२ महिनासम्म चलेको थियो। सोही बेला प्रचण्डले आम सभालाई सम्बोधन गर्दै नेता नेपाललाई ‘विष वृक्ष’ भनेका थिए।