वीर अस्पतालको सर्जिकल भवनमा कोरोना संक्रमितको उपचार सुरु, लिक्विड अक्सिजनको व्यवस्था

काठमाडौं – वीर अस्पतालको नयाँ सर्जिकल भवनमा कोरोना संक्रमितको उपचार सुरु गरिएको छ। सरकारले वीर अस्पताललाई कोभिड-१९ युनिफाइड केन्द्रीय अस्पताल घोषणा गरेसँगै नयाँ भवनमा मंगलबारदेखि बिरामी भर्ना गरेर उपचार दिन थालिएको हो ।

नयाँ भवनमा अक्सिजन व्यवस्थापनका लागि अक्सिजन सिलिण्डर र लिक्विड अक्सिजनको व्यवस्था गरिएको कोरोना युनिफाइड अस्पतालका प्रमुख डा जागेश्वर गौतमले बताए । तर अक्सिजन प्लान्ट नयाँ भवनमा नभएकाले हाललाई कम अक्सिजन आवश्यक पर्ने बिरामीलाई मात्र राखिएको डा गौतमले जानकारी दिए। नयाँ भवनमा ५० शय्या संचालनमा ल्याइएको पनि डा गौतमले बताए।

‘वीर अस्पतालको पुरानो भवनमा त पहिला पनि बिरामीहरु थिए, म आएपछि आजदेखि नयाँ भवनमा ५० बेड सञ्चालन गरेर बिरामीको उपचार सुरु गरिएको छ,’ डा गौतमले भने, ‘बिरामीहरु नयाँ भवनमा भर्ना भइसके, अहिलेलाई कम अक्सिजन आवश्यक पर्ने बिरामीलाई राखेका छौं।’

केहीदिनभित्रै सो भवनमा १०० बेड सञ्चालनमा ल्याउने तयारी भइरहेको उनको भनाइ छ। बिरामीको चाप र आवश्यकता अनुसार ५०० बेड नै सञ्चालन गर्न पनि तयारी अवस्था रहेको डा गौतमले जानकारी दिए। उनले अक्सिजन प्लान्टको व्यवस्थापन गर्ने तयारी गरेको जानकारी दिए।