बौद्ध–थली क्षेत्रमा वर्षौंदेखि खुलेआम ‘तीन गोटी उखर’को जाल: सेनाको अपरेशनपछि प्रहरीको भूमिकामाथि गम्भीर प्रश्न

काठमाडौं – बौद्धलाई आधार क्षेत्र बनाएर थली, साँखु तथा आसपासका क्षेत्रमा लामो समयदेखि सञ्चालन हुँदै आएको भनिएको अवैध ‘तीन गोटी उखर’ जुवाको सञ्जाल अन्ततः नेपाली सेनाको अपरेशनपछि कानुनी अनुसन्धानको दायरामा आएको छ। गत शुक्रबार नेपाली सेनाले उक्त गतिविधिमा संलग्न रहेको आरोप लागेका केही व्यक्तिलाई नियन्त्रणमा लिएर थप अनुसन्धान तथा आवश्यक कानुनी कारबाहीका लागि नेपाल प्रहरीलाई जिम्मा लगाएको सुरक्षा स्रोतले जनाएको छ।

प्राप्त जानकारीअनुसार पक्राउ परेकामध्ये सुजन मुक्तानसहितको टोलीमाथि अनुसन्धान जारी छ। तर, यस घटनाले अर्को गम्भीर प्रश्न पनि उठाएको छ—सार्वजनिक स्थानहरूमा वर्षौंदेखि सञ्चालन भइरहेको भनिएको यस्तो अवैध गतिविधि सम्बन्धित सुरक्षा निकायको जानकारीबिना सम्भव थियो कि थिएन?

स्थानीय बासिन्दाहरूका अनुसार बौद्ध, थली र आसपासका क्षेत्रमा विगत तीन–चार वर्षदेखि ‘तीन गोटी उखर’को खेल नियमित रूपमा सञ्चालन हुँदै आएको थियो। स्थानीयले केही प्रहरी कर्मचारी तथा सादा पोसाकमा परिचालित सुरक्षाकर्मीसँगको मिलेमतोका कारण यस्तो गतिविधि निर्बाध रूपमा चल्दै आएको आरोप लगाएका छन्। यद्यपि, यी आरोपबारे नेपाल प्रहरीले हालसम्म कुनै आधिकारिक धारणा सार्वजनिक गरेको छैन।

स्थानीयका अनुसार उक्त खेलका कारण धेरै सर्वसाधारण आर्थिक रूपमा गम्भीर रूपमा प्रभावित भएका छन्। कतिपयले घरजग्गा गुमाएको, ऋणमा डुबेको र परिवार नै संकटमा परेको दाबी गरिएको छ। स्थानीयले कान्छी मुक्तान र सुजन मुक्तानलाई उक्त सञ्जालका मुख्य सञ्चालकमध्येका व्यक्तिका रूपमा उल्लेख गर्दै उनीहरूले अवैध रूपमा ठूलो रकम आर्जन गरेको आरोप लगाएका छन्।

कानुनविद्हरूका अनुसार अनुसन्धानका क्रममा अवैध आम्दानीबाट सम्पत्ति जोडेको तथ्य पुष्टि भए जुवा तथा संगठित अपराधसँगै सम्पत्ति शुद्धीकरण निवारण ऐन अन्तर्गत समेत अनुसन्धान अघि बढाउन सकिने कानुनी आधार रहन्छ।

यसैबीच, पक्राउ परेका व्यक्तिहरूलाई छुटाउन केही बिचौलियाहरू सक्रिय भएको तथा अनुसन्धानलाई प्रभावित पार्न विभिन्न तहबाट प्रहरीमाथि दबाब सिर्जना गर्ने प्रयास भइरहेको सूचना सुरक्षा स्रोतहरूबाट प्राप्त भएको दाबी गरिएको छ। यद्यपि, यसबारे सम्बन्धित निकायबाट आधिकारिक पुष्टि हुन बाँकी छ।

स्थानीयवासीले घटनाको निष्पक्ष छानबिन गर्दै यदि कुनै प्रहरी कर्मचारी वा अन्य व्यक्तिको संरक्षण, मिलेमतो वा आर्थिक लाभ लिएको तथ्य प्रमाणित भए उनीहरूमाथि पनि कानुनबमोजिम कडा कारबाही गर्न माग गरेका छन्।

अब सबैको ध्यान नेपाल प्रहरीको अनुसन्धानतर्फ केन्द्रित छ। अनुसन्धान निष्पक्ष र प्रभावकारी ढंगले अघि बढ्छ कि प्रभावशाली व्यक्तिहरूको पहुँचका कारण यो प्रकरण पनि ओझेलमा पर्छ भन्ने प्रश्नले स्थानीयवासीमा चासो र आशंका दुवै बढाएको छ।