काठमाडौंबाट उडेको बुद्ध एयरको विमान काठमाडौं फर्काइयो
कागजपत्र |
काठमाडौं – काठमाडौंबाट जनकपुरका लागि उडेको बुद्ध एयरको एक जहाजमा प्राविधिक समस्या देखिएपछि बीच बाटै काठमाडौं फर्काइएको छ।
सोमबार बिहान करिब ७:०५ बजे त्रिभुवन अन्तर्राष्ट्रिय विमानस्थलबाट जनकपुरका लागि उडेको उक्त जहाजमा ल्यान्डिङ गियरसँग सम्बन्धित समस्या देखिएपछि उडानलाई बीचमै रोक्दै काठमाडौं फर्काइएको हो।
प्राविधिक समस्या देखिएपछि जहाजलाई आकस्मिक अवस्थामा पुनः त्रिभुवन अन्तर्राष्ट्रिय विमानस्थलमा सुरक्षित अवतरण गराइएको विमानस्थल कार्यालयले जनाएको छ।
विमानस्थलका प्रवक्ता सञ्जय कुमारका अनुसार जहाज सुरक्षित रूपमा अवतरण गरिएको छ र सबै यात्रु तथा चालक दलका सदस्य सुरक्षित रहेका छन्।
उनले जहाजमा देखिएको प्राविधिक समस्याबारे थप परीक्षण भइरहेको जानकारी दिए। साथै प्रभावित यात्रुहरूलाई वैकल्पिक व्यवस्थामार्फत गन्तव्यसम्म पुर्याउने तयारी भइरहेको बताइएको छ।
