तमिलनाडुमा विजयको उदय, बंगालमा भाजपाको बहुमततर्फ अग्रता
कागजपत्र |
काठमाडौं- भारतका तमिलनाडु र पश्चिम बंगालमा सम्पन्न विधानसभा निर्वाचनको प्रारम्भिक मतगणनाले राजनीतिक वृत्तमा ठूलो हलचल ल्याएको छ। दुवै राज्यमा देखिएको सुरुवाती रुझानले परम्परागत शक्तिसन्तुलनमै परिवर्तन हुने संकेत देखाएको छ।
तमिलनाडुको २३४ सिटमा सुरु भएको मतगणनाको प्रारम्भिक परिणामअनुसार अभिनेता विजयको नवगठित पार्टी तमिलगा भेत्री कझगम (टिभिके) ले अप्रत्याशित रूपमा अग्रता बनाएको छ। सुरुवाती दुई घण्टाको रुझानमा टिभिके ११३ सिटमा अघि देखिएको छ, जसले चेन्नईदेखि मदुरैसम्म सत्तारुढ डीएमकेको पकडमा ठूलो धक्का पुर्याएको छ। एआईएडीएमके नेतृत्वको गठबन्धन दोस्रो स्थानमा देखिँदा डीएमके, कांग्रेस र डीएमडीकेको गठबन्धन तेस्रो स्थानमा खुम्चिएको छ।
उता पश्चिम बंगालमा २९४ सिटको मतगणनामा भारतीय जनता पार्टी (भाजपा) ले बहुमतको सीमाभन्दा माथि पुग्दै १६० भन्दा बढी सिटमा अग्रता लिएको छ। मुख्यमन्त्री ममता बनर्जी नेतृत्वको तृणमूल कांग्रेस भने ११० सिट आसपासमै सीमित देखिएको छ।
यस निर्वाचनअघि मतदाता नामावलीबाट करिब ८९ लाख मतदाता हटाइएको विषयलाई लिएर ठूलो विवाद भएको थियो। ममता बनर्जीले निर्वाचन आयोगविरुद्ध खुला विरोध जनाएकी थिइन्। अहिलेको प्रारम्भिक नतिजाले भने पश्चिम बंगालको राजनीतिमा ठूलो परिवर्तनको संकेत गरेको विश्लेषण गरिएको छ।
दुवै राज्यमा देखिएको यो रुझानले भारतको क्षेत्रीय राजनीतिमा नयाँ समीकरण निर्माण हुने संकेत दिएको छ।
