कारबाहीमा परेकी जुनु श्रेष्ठ फेरि स्वास्थ्य बिमा बोर्डमा फर्किइन्
कागजपत्र |
काठमाडौं – स्वास्थ्य तथा जनसंख्या मन्त्री निशा मेहताले श्रम तथा रोजगार मन्त्री दीपककुमार साहकी पत्नी जुनु श्रेष्ठलाई पुनः स्वास्थ्य बीमा बोर्डको सदस्य पदमा फर्कन अनुमति दिएकी छन्।
बोर्ड सदस्यमा मनोनीत श्रेष्ठ यसअघि लगातार ११ वटा बैठकमा अनुपस्थित रहेकी थिइन्। तर, सोमबार अचानक उनी बैठकमा उपस्थित भइन् र पुनः सक्रिय देखिएकी हुन्।
श्रेष्ठलाई तत्कालीन स्वास्थ्य मन्त्री मोहनबहादुर बस्नेतले बोर्ड सदस्यमा नियुक्त गरेका थिए। तर, स्वास्थ्य बीमा ऐनअनुसार कुनै पनि सदस्य लगातार तीन पटक बैठकमा अनुपस्थित भएमा स्वतः निलम्बन हुने प्रावधान रहेको छ। यही व्यवस्थाअनुसार उनी निलम्बनमा परेकी थिइन् र गत वैशाखमै सदस्य पदबाट हटाइएकी थिइन्।
तर, निलम्बनमा परेकी श्रेष्ठलाई फेरि सोही पदमा फर्काइएको छ।
उता, राष्ट्रिय स्वतन्त्र पार्टीका सभापति रवि लामिछानेले राजनीतिक नियुक्ति पाएका सार्वजनिक पदाधिकारीहरूलाई स्वेच्छाले पद त्याग गरी मार्ग प्रशस्त गर्न आह्वान गर्दै आएका छन्। उनले संसदमै उभिएर यस्ता पदाधिकारीलाई पद छाड्न आग्रह गरेका थिए।
