धोनीले आईपीएलको यस सिजनका सबै खेल खेल्ने

काठमाडौं – भारतीय क्रिकेटका पूर्वकप्तान महेन्द्रसिंह धोनीले इन्डियन प्रिमियर लिग (आईपीएल) २०२६ का सबै खेल खेल्ने निश्चित भएको छ।

चेन्नाई सुपर किंग्सका मुख्य प्रशिक्षक स्टिफन फ्लेमिङले धोनी यस सिजनका लागि पूर्ण रूपमा तयार रहेको र उनले सबै खेल खेल्नेमा टोली विश्वस्त रहेको जानकारी दिएका हुन्।

पछिल्ला केही सिजनदेखि धोनीको सन्न्यासलाई लिएर विभिन्न अड्कलबाजी भइरहेका थिए। ४४ वर्षीय धोनीले आफ्नो फिटनेस र खेलप्रतिको लगावलाई कायमै राख्दै अर्को सिजनका लागि आफूलाई उपलब्ध गराएका छन्।

प्रशिक्षक फ्लेमिङका अनुसार धोनीको उपस्थिति टोलीका लागि केवल एक खेलाडीका रूपमा मात्र नभई रणनीतिक मार्गदर्शकका रूपमा समेत महत्त्वपूर्ण रहने छ।

धोनीले अघिल्लो सिजनमा पनि ब्याटिङ गरेका थिए। उनले घुँडाको चोटका बाबजुद पनि टोलीलाई आवश्यक परेको बेला मैदानमा ओर्लिएर योगदान दिएका थिए। यसपटक भने उनी पूर्ण रूपमा स्वस्थ भएर मैदान उत्रने तयारीमा छन्।

चेन्नाई सुपर किंग्सले धोनीलाई ‘अनक्याप्ड’ खेलाडीको श्रेणीमा राखेर टोलीमा अनुबन्ध गरेको हो। यसले गर्दा टोलीलाई अन्य स्टार खेलाडी खरिद गर्न आर्थिक सन्तुलन मिलाउन सहज भएको छ। धोनीको कप्तानीमा चेन्नाईले पाँच पटक आईपीएलको उपाधि जितिसकेको छ।

प्रशिक्षक फ्लेमिङले भने, “धोनीको अनुभव र खेल प्रतिको बुझाइ अद्वितीय छ। उनले खेल्ने निर्णय गर्नु हाम्रो टोली र समर्थकका लागि ठुलो उत्साहको विषय हो।”

आईपीएल २०२६ को तालिका सार्वजनिक भएसँगै धोनीको प्रदर्शनलाई लिएर चासो बढेको छ।